本身係新聞主播嘅方東昇因拍攝節目《長命百二歲》而大受觀眾喜愛，似乎唔做主播都可以轉行做節目主節！不過，回想有唔少TVB離巢主播雖然已離開公仔箱，但原來佢哋依家嘅生活甚至比做主播時更多姿多彩！你又知唔知呢？
公開6位昔日TVB主播離巢生活
｜伍家謙
有體育新聞王子之稱嘅伍家謙新聞系畢業後就喺報館做體育記者，之後加入無綫做新聞及體育主播。然而，15年伍家謙與無綫結束11年賓主關係，其後轉為自由工作者。
不過，佢間唔時會同無綫以合約形式做採訪記者。據知，佢更開咗間自己嘅多媒體公司，推廣本地體育發展。另外，伍家謙亦有參與幕前演出及擔任司儀。
｜方健儀
42歲嘅方健儀2006年加入無綫，不時採方重點新聞，除咗係一位記者外，更係一位新聞主播。
2012年離開無綫後，方健儀除寫報章專欄、擔住司儀外，亦成為一位皮革手作人，不時會參與手作市集。
｜ 陳嘉倩
有無綫第一美女之稱嘅陳嘉倩14年加入無綫做新聞主播，不過3年後就離開無綫。
雖然冇再做新聞主播，但佢就為港台節目《大氣候》擔任主播，之後又喺Viu TV擔任旅遊節目主持。
｜黃大鈞
43歲嘅黃大鈞曾經係香港電台工作，其後轉到無綫新聞部做主播。可惜，黃大鈞喺2012年因神經線受感染而面癱，需要停工接受治療，更因而離開無綫。
雖然冇再擔任新聞主播，但依家除咗係個公關同IG追蹤人數過萬嘅網紅外，仲係香港葡萄酒商會餐飲文化委員會主席，而且亦開創寵物網站「毛城城」。
｜周嘉儀
36歲嘅周嘉儀04年於香港浸會大學新聞系畢業後，隨即加入無綫，05年更踏上新聞主播之路。可惜，2015年周嘉儀離開無綫，當時臨別最後一刻仲同觀眾講：「今日係我最後一次喺《香港早晨》同大家見面啦，多謝過去咁多年嚟嘅支持，祝你哋以後每朝都有個美好嘅早晨，再見」。
離開主播之路後，周嘉儀即加入興業證券市場拓展部，同時亦不時出席公開活動，而且聽講佢多咗個興趣，就係入馬場買馬，唔知大家有冇喺馬場賽馬日撞過佢呢？
｜柳俊江
依家37歲嘅柳俊江（柳爺）畢業於香港浸會大學傳理學院新聞系，02年加入無綫新聞部。多年嚟，柳爺報道過唔少大大小小嘅新聞，例如：四川大地震、北京奧運等。
可惜，柳爺於2010年堅決離開娘家，事源柳爺要同喺大學認識嘅女朋友結婚，當事更表示離開無綫嘅原因係：「因為要養家」。離開無綫後，柳爺後而喺事業上有更多唔同發展及嘗試，如曾任香港愛護動物協會中國外展總監、出任九巴社區事務經理，依家更致力於動物保育及環保工作。
近年更成為古天樂旗下Facebook專頁「FoolClub」嘅管理團隊，上年中更開設個人YouTube頻道，而且亦有參與幕前演出，參演電視劇集及電影，可謂八足咁多抓。
｜方東昇
42歲嘅方東昇1998年就喺無綫新聞部擔任實習記者，後來除咗候記者外，仲同時兼任新聞主播，至今已經喺無綫工作超過20年。
方東昇雖然未離開無綫，但依家除咗做新聞主播外，亦會參與拍攝綜藝節目，例如：《世界零距離》、《長命百二歲》等，更因喺節目中不時爆出金句，獲得觀眾嘅喜歡而人氣急升，睇嚟佢唔做主播都可以選擇做節目主持！
(資料來源：網上截圖/連結)
