姜皓文望拍殭屍Marvel 吳廷燁唔想再等20年

238

姜皓文(黑仔)日前出席《鐵探》活動,與劇中演員吳廷燁及兩位小演員黃學盈(彤彤)、潘姿善(晴晴)等大玩直播,黑仔和吳廷燁這兩位昔日亞視之友,得到不少網民的稱讚,想起當年兩人在亞視一起演出過《我和殭屍有個約會》,如今由殭屍變為卧底鐵探。

戲中兩人互相鬥法,戲外其實老友鬼鬼,「亞視之友」相隔20年再在電視劇碰頭,黑仔回想當年:「最記得拍《我和殭屍有個約會》去日本外景,當其時去日本拍外景算係一部大製作啦!之後拍《新包青天》又去泰國登台。所以當年喺亞視拍劇真係遊遍東南亞。套劇播出之後又有登台機會,我嘅歌藝就係咁磨練出嚟,所以我又演得又唱得㗎!」

當黑仔得知可以再和吳廷燁亦合作,即興奮不已,他說:「因為我哋見面多合作少,知道大家可以再喺鏡頭前交手,正到不得了,壽仔(吳)呢啲對手唔易搵㗎,加上我哋係《殭屍》班底,一早有默契。」吳廷燁也坦言演得過癮:「今次同黑仔有好多對手戲,大家又可以一齊鬥番場好戲,希望日後有更多合作機會,唔使一等又等20年啦!」兩人更笑言最好來個《我和殭屍有個約會》復盟版,就像Marvel英雄一樣,相信在香港觀眾心目中,他們也是一班殭屍英雄。

此外,黑仔與劇中兩位小女孩的「父女情」令不少觀眾動容,他也心動想收兩位做契女:「兩位小朋友都好醒目聰明,動作同感情戲一講就明,合作起嚟其實我好享受。」而晴晴和彤彤不約而同說:「初初見到都會驚,覺得佢好cool,但後尾都好鍾意佢,因為佢對小朋友好溫柔,成日都氹我哋笑。」

(資料來源:網上截圖/連結)