1975年3月23日，19歲的陶敏明嫁給29歲的狄龍，上月兩人剛踏入44周年結婚紀念。
那些年狄龍認識陶敏明時，她只有14歲，兩人拍拖5年，等到女友成年了，終於可以長相廝守。兒子譚俊彥今年38歲，2015年娶大陸藝人任祉妍，育有一子一女，狄龍榮升爺爺後弄孫為樂。
狄龍跟太太的愛情故事很精采：「喺一個電視台訪問環節，佢當時係舞蹈組出色藝員，我睇佢跳舞跳得咁好，有朋友話介紹我認識，我都冇放喺心入面；有次喺尖沙嘴咖啡室又碰番上，我想攞佢電話，又唔記得帶筆，我就記得：『夥計，畀盒火柴我。』咁我就點着咗、整熄咗，然後喺張紙定手度寫咗佢屋企電話no.，我話同你飲茶，咁就由嗰次開始。」
陷入回憶的狄龍說：「戀愛都係甜蜜嘅，大家冇條件嘅，經過幾個月發覺佢只係14歲，咁都一直交往落去，因為佢好早出嚟做嘢幫家，佢嘅言談、外型都係似18歲女仔，佢早熟。」當年的社會仍保守，問到陶敏明的家人沒反對未成年拍拖？狄龍坦言：「初初都驚嘅，以為我哋拍戲冇個好人，好彩我哋兩個都走過嚟走落去。」
老夫老妻的他們，怎樣維繫婚姻之道？狄龍說：「前期我硬淨，後期佢硬淨，後生嘅時候都係佢聽我講，而家反過嚟我多聽佢講，因為佢講得有道理。」當年狄龍紅遍東南亞，問到有否受過引誘？他坦言：「有嘅，自己知嘅，自己有犯過錯，自己都有內疚，因為唔單止係 對唔住太太，仲對唔住某一方，係自己唔啱，但呢啲事都過咗，唔想再提，知錯，回頭是岸。」
至於73歲的他怎樣養生？狄龍說：「睇我外表精壯，但啲關節呀、以前拍武俠片斷咗三截，腰呀都有問題，我哋叫做老牛破車，舊患，太太成日話我鍾意食燒臘，盡量食少啲，應酬少啲，老人病通常都有，食啲血壓藥。」問到點睇生老病死？他淡然說：「花開花落，人來人散都係常事，『縱浪大化中，不喜亦不懼，應盡便須盡，無復獨多慮。（陶淵明《神釋》）』老天的召喚，誰能避得過，順其自然啦！」
(資料來源：網上截圖/連結)
