【跪低道歉】程美段被「拖糧」3個月 杜汶澤網台出聲明認行政失當

杜汶澤的網台「喱騷」疑向程美段（車厘龜）「拖糧」事件，搞足幾日，兩人各有理據互相指控，昨晚程美段出「終極武器」語音為證，在facebook公開「喱騷」要員豪仔的WhatsApp錄音，證明豪仔當初曾承諾一星期後出糧；由於證據確鑿，杜汶澤的網台「喱騷」今早在FB專頁發聲明，承認公司行政失當，正式向程美段道歉。

「喱騷」在聲明中指出：「就於本公司總經理黎先生向程美段小姐曾作出之口頭承諾，聲稱演出後一個星期支付演出費，結果在三個月後才付款，此乃行政失當，本公司深表歉意，並會作出檢討，確保日後與藝人合作時，有更妥善的安排。」並多謝大家一直以來支持該台，今後定當繼續努力，為觀眾製作更多高質低俗的娛樂節目。

由於「喱騷」跪低認錯，網民紛紛留言揶揄阿澤：「自打嘴巴，令人失望」、「咁快跪低，唔撐嗱？唔係講粗口代表有道理」、「件事可憐咗車厘龜，你自己都俾人封殺過，點解唔可以將心比己？成也網民敗也網民，畀少少同理心唔好再做小家嘢啦」。