肥媽（Maria Cordero）去年10月舉行慈善晚宴為香港防癌會籌錢，惟主辦單位「尊位集團」拖欠百萬善款，防癌會指直至本月1日仍未收到款項，會將事件交律師處理。前歌手文恩澄和龍小菌都是苦主之一，文恩澄更因被拖糧令經濟出現問題，上月要向銀行借錢交租。
現任職導演的文恩澄，去年尾為尊位集團執導拍宣傳片，惟對方至今未找數。文恩澄接受電話訪問表示：「睇番啲單，佢其實係欠我11萬，我哋呢行收入已經唔穩定，一個導演仔搵到幾多錢，我又唔係高收入嗰批人，積蓄又唔多，公司同屋企嘅租、水電煤樣樣都係錢，佢唔找數，搞到我上個月問銀行借錢交租！」
文恩澄坦言唔鍾意走人數，所以就算自己未收到尊位集團的錢，她都自掏腰包出糧給攝製隊：「我借銀行又好，點都會找數先，我唔明白點解有啲人可以呃人錢走咗去，等人哋白做，甚至貼錢幫你做！」
雖然一直有WhatsApp及致電尊位集團負責人郭敦誠追數，但對於完全沒回覆，文恩澄說：「上個月佢哋fb話有會員退款大會喺香格里拉，我搵人去睇過，但去到香拉職員話冇人book過場，咁佢哋喺fb話唔知點點點要延期，改到去4月21號，但又冇件事。」
文恩澄嘆說：「我都唔知可以點做，因為筆錢係我畀出去，我出咗糧畀人先，我唔係淨係冇人工收白做咁簡單，我係蝕錢，因為呢單嘢，我經濟有問題。」
至於曾為尊位集團處理online marketing的龍小菌，被拖糧2個月及墊支費合共43,000元，她今日以短訊回覆指仍未收到錢：「俾人走數當然難受，但係都向前看，畀心機做嘢，自己有生意處理都好忙，以後帶眼識人。」
而肥媽短訊回覆：「我嗰40幾萬都未收到，我都搵唔到佢。我最早出咗律師信畀佢香港間公司，而家都搵唔到佢，同老公商量使唔使去備案，我諗都要去，我要問一問律師呀，係小額錢債定係乜嘢，我問咗律師就即刻去做啦。」
(資料來源：網上截圖/連結)
