王喜、陳鍵鋒、蔣祖曼、歐錦棠與岑珈其等日前到港台出席「最佳節目頒獎禮2018」活動，他們有份演出的港台劇《火速救兵IV》，獲頒「全年最高平均欣賞指數大獎」。
《火》首集有長達3分鐘一鏡過的鏡頭，獲網民激讚，王喜說：「拍攝嘅時間花多4、5倍，因為要排。」消防員角色是否特別旺他？王喜笑謂：「對老闆嚟講係好事，我有嘢撈都係好事，用自己最擅長嘅公眾形象接觸大家，大家都開開心心，畢竟我係個老演員，冇乜新角色可以令大家一下子接受。」
王喜透露現時正放假，新工作洽談中：「係有關醫療嘅嘢，係咪估我唔到呢？」記者笑問他是否做整容代言？王喜說：「我整乜呀？而家老咗變咗雙眼皮，如果真係整，我想整番單眼皮。我真係有問過，如果唔使錢，我會考慮。」至於他的「Honey」陳志雲可曾考慮整容？王喜即笑指他真有考慮過：「其實以佢實際年齡，已經好好，男人有兩樣嘢唔怕多，一係錢一係頭髮，佢兩樣都有。」
陳鍵鋒明顯大隻不少，他透露早排勤操肌：「最近成日病，身體唔係咁好，都係休息多。我又夜瞓，不過唔係夜蒲呀，喺屋企睇劇。」問他會否翻看以前作品？陳鍵鋒斬釘截鐵說：「唔會，尤其而家早上播嗰套《王老虎搶親》，啲朋友係咁cap圖畀我，睇到暈咁滯。我哋王老虎有個group，得閒都聚下，德哥（潘嘉德）話有機會想做舞台劇。」
當了多時急救班導師的他，早前於網上指女學員塗紅唇練習CPR，陳鍵鋒說：「我係覺得好得意，不過佢哋唔會理我架，照搽唇膏。好多學員初初見到我，十個都呆咗，唔相信我係導師。」
至於蔣祖曼在電視劇《鐵探》的角色大受歡迎，她說：「初初自己都覺得個粉紅頭好誇，驚睇唔到我演技，同埋真係染足半年，而家染番黑有啲唔慣。」她笑指女兒亦有收看，但每每看到她被打的鏡頭，便會躲起來不看，她說：「佢好緊張，大仔就話鍾意我做警察多啲，不過我唔會理佢哋，我都想做其他角色。」
(資料來源：網上截圖/連結)
