湯鎮業的一對24歲孖仔，大孖湯君慈（Bruce）與細孖湯君耀（Chris）有一個索媽媽姜坤（Christy），姜坤曾參選亞姐，之後簽約亞視，但因發現為湯鎮業懷孕後就解約，做全職媽媽，生下大女湯愛嘉，之後再生下孖仔，已48歲的她身形keep得甚窈窕，保養得宜，絕對稱得上是索媽，與一對孖仔站在一起，猶如三姊弟一樣，而兩兄弟笑言與媽咪一齊，常被人誤會是姊弟，細孖Chris更笑指，曾與媽咪蹺住手出街驚被誤會是女友，而Christy亦講笑與小鮮肉拍拖。
Christy多年未有接受訪問，看她以「大寶寶」及「細寶寶」稱呼一對兒子，就知她視他們如珠如寶，拍攝時她自然地蹺實囝囝手臂、挨落囝囝膊頭，而Bruce及Chris應記者要求錫媽咪，他們亦絕不會如大男孩般怕醜，三母子感情十分親密。雖然大細孖出世時間相差只有兩分鐘，但她分辨大細孖絕對沒難度，自覺他們外貌上不太相似，亦未有試過認錯仔，她指大孖性格剛強一點，有主見一點似自己，而細孖性格似湯鎮業，比較隨意同小朋友。
原來她生這對寶貝仔的十月懷胎過程相當辛苦，她分享這個難忘經歷時，大孖Bruce即笑言：「辛苦晒，媽咪，呢個故事聽過無數次，每年生日都聽一次，佢話我哋生日都係佢嘅生日，因為佢係好辛苦。」而在旁的Christy表示：「生家姐嗰時係正常，係140、150磅，生佢哋兩個嗰時係190磅，係誇張係好辛苦，體重多咗個double，佢哋兩個出世，細佬7磅13，大佬7磅8，兩個都好重，陀B過程要喺床瞓咗半年，唔敢落床。而家生完咁耐，腰都歪咗有問題，負荷太重，同埋食嘢都唔可以食太甜，會有痹痛感覺。」
捱過陀B時的辛苦，Christy表示之後湊小朋友的生活相對輕鬆：「生呢3個都好值得，生完佢哋之後，我唔覺得辛苦，享受同佢哋一齊嘅時候。」對於兒子的教導，她表示他們自小已好乖自律，不用她粗心，亦不用強迫。問到她若然兩個仔爭執會如何解決，她就分享了一個兩兄弟打波爭執的經歷：「佢哋好少喺我面前嗌交，驚我會擔心，有一次好驚，細寶打畀我，喊住話個鼻不停流血，喺學校，我即刻接佢，原來係大寶打到佢流血。要去到醫院做手術，大寶嗰時好驚，懲罰佢陪細寶半夜做手術，已經唔需要鬧，大寶已經好內疚，我教育三個仔女嘅方法，唔會特別鬧。」在旁的Bruce即表示：「我都嚇咗成晚，第二日買早餐畀細佬食。」
問到Christy覺得做媽咪最大犧牲是甚麼？她表示結束了婚姻後，已想好為了子女不會再婚：「我都離咗婚差唔多20年，我都好享受同佢哋三個嘅時間，所以為咗佢哋三個都唔會諗再結婚，再有自己家庭，呢個係我一早放棄咗嘅嘢。」在旁的孖仔都異口同聲支持她再搵另一半，Bruce說：「其實我同細佬冇乜所謂，都想媽咪有個伴，最緊要媽咪開心。」Christy即笑他們：「而家佢哋話冇所謂，都20幾歲，我唔想畀小朋友再有咁多，自己媽咪始終同爹哋唔同，媽咪同第二個男人有家庭生BB，對佢哋成長會唔係咁好，我自己都接受唔到呢樣嘢。」
Bruce與Chris對媽咪相當愛錫，笑言從來不會搗蛋整蠱對方，細孖Chris更爆料小時候愛扮女仔着裙冧媽咪，Christy表示：「其實我鍾意女多啲，佢有時着家姐啲公主裙，好得意跳芭蕾舞。」Christy外形比較柔弱，而兒子亦已長大，三母子愛互相制衡對方，譬如她計劃將三子女的名字紋上身，兩個仔就反對，而細孖Chris想穿耳窿，她亦會反對，Chris表示：「15歲嘅時候一直想穿，不過驚媽咪唔畀，等咗幾年，18歲成年先穿，所以好尊重媽咪，但穿完之後，媽咪有買耳環畀我。」在孖仔心目中，媽咪是完美的，問到將來搵女友會否以她為藍本，他們都表示：「最好啦，不過難搵，因為媽咪係好到絕晒種，要搵一個錫媽咪嘅女仔做女朋友，第時結咗婚，同媽咪一齊住，買隔籬單位。」
一對孖仔入行做演員，作為母親會支持，平時會幫他們剪報，而他們第一次主演的電影《大師兄》，她就至少睇了三次，Christy說：「第一次我估唔到係好好，大寶表現比我想像中好，我以為細佬會蠱惑啲，估唔到佢做得好好。做每一個行業都係，一定要努力，乜都係一個經歷，做就認真去做，仲後生可以多啲去試唔同嘅嘢，總之係唔可以學壞，由細到大唔好學壞，要聽話，要乖啦，唔可以食煙、飲酒、吸毒，絕對唔可以，講粗口我都好反對，佢哋知我底線喺邊度。」
(資料來源：網上截圖/連結)
