陳凱琳（Grace）產後上圍明顯升級身材fit爆，日前穿著低胸碎花裙現身將軍澳和大家慶祝母親節，和現場觀眾玩遊戲，更獻唱《月亮代表我的心》，大會又安排小女孩向她送花，寓意希望她追多個女。
活動期間Grace表示每日都忙湊B仔Rafael，今日她外出賺外快，老公鄭嘉穎在家中湊B，母親節不需要物質的禮物，但會各自送禮物給媽咪，一家人在家食飯慶祝已很開心。Grace又激讚嘉穎：「老公好幫手照顧BB成日叫我瞓多啲，又擔心我要餵夜奶休息唔夠，好主動幫手照顧BB。」
囝囝現時三個月大，Grace坦言：「一踏出屋企門口就會好掛住BB，活動後會趕返屋企，阿仔開始識好多嘢，例如傾偈都會有反應，好可愛，每日見到BB長大感覺真係好幸福。」Grace媽媽已返回加拿大，奶奶則想讓她們一家三口感受第一個母親節。Grace說：「本身都打算出街食飯慶祝，但阿仔仲好細，未去過咁多人嘅環境，所以都係屋企食飯後，推BB車落街行吓。」
Grace透露嘉穎在母親節特意請假，近期亦減少出埠工作，她說：「佢想陪我同BB多啲，佢又唔放心我太辛苦，感恩有個咁好嘅老公幫我湊BB。」經常在家中湊B，Grace笑言：「我哋變咗宅男宅女，成日追劇，反而以前冇咁多時間睇電視，我仲讚佢以前個樣同而家一樣。」
兩公婆不時會爭住抱B，Grace就鍾意替BB沖涼，嘉穎掃風較叻，大家分配工作。是否已開始追B？Grace說：「遲啲先，一個已經有好多嘢要學習，等Rafael一歲幾先，自己又多咗經驗先再考慮。好隨緣，男仔可以用返而家啲嘢，女仔就開心啲，比較嗲，又可以扮靚，順其自然啦。」想兒子叫爸爸先，還是媽媽先？Grace說：「冇所謂，長輩話爸爸較易發音，如果會媽媽先咪當賺咗。」
而被讚到上天的嘉穎今日亦於IG貼出媽媽與老婆的相片，並留言：「我心目中兩個最美麗的母親！祝母親節快樂。」
(資料來源：網上截圖/連結)
