現年45歲、94年亞姐冠軍李妮，當選後做了一陣子藝員，馬上獲幸運之神眷顧，嫁得筍盤富商老公陳國泰，對方是美籍華裔，她婚後即息影，過着少奶奶生活，經常夫唱婦隨周圍飛，她也學做生意，曾做博愛醫院副主席，以及海南省港區政協委員。
李妮婚後貼身照顧老公，兩夫妻都愛小孩，努力造人下去年終如願，李妮婚後生活，配合有米老公，非常低調，過去一年「神隱」，原來去年中在美國誕下囡囡Phyllis，李妮升呢做了媽咪，更以家庭為首，囡囡本月底便1歲生日，李妮近日向友人表示有意追仔，以湊成「好」字。
李妮甚少在社交網分享夫丈及囡囡Phyllis的照片，傳媒收到多張兩母女的相片，其中一張相，Phyllis似是初生BB，李妮小心地抱着她，母愛氾濫，眼裏充滿愛意。這張相似是剛生完囡囡，她在社交網報喜，下面還留言：「謝謝大家，母女平安，爸爸快樂，感謝親朋友們的祝福。」
傳媒致電神秘升呢為人母的李妮，她說：「屋企多咗囡囡，係好開心嘅一件事，係天賜禮物，我哋婚後一直都想有，囡囡雖然遲來，但我又卸任咗博愛醫院副主席，時間多咗都好合時。」李妮去年為何選擇在美國產女？她說：「我哋嗰邊有屋，同埋美國生BB醫院好好，佢一生完就將BB畀番媽咪親手照顧，BB未有一刻離開過我，我哋好close，我坐月時都請咗一個陪月姐姐幫手，坐完月先返嚟。」李妮有女萬事足，囡囡生得跟爸爸餅印一樣，但由於囡囡被指是老公的前世情人，李妮扮呷醋：「佢一出世，我就失戀。」李妮打算再努力追仔，也為自己生一個前世情人：「追到梗係想追，我想囡囡多個伴，最好一至兩個。」李妮生女消息未有張揚，她說：「我想三個人低調過幸福生活，慢慢享受。」李妮每天盡量親手照顧Phyllis，不放心交給工人。
(資料來源：網上截圖/連結)
