話說最近有網民以「好懷念男人長髮嘅髮型」為題出post指好懷念以前男人留長頭髮嘅時光，仲話唔知男人長髮嘅潮流幾時先會返嚟！的確，以前真係幾興男人長髮，而娛圈亦有唔少男星同樣以長髮造型示人之餘，仲要好型仔！
盤點9位娛圈長髮男星
｜木村拓哉
仲記得，80年到00年由於深受日本潮流文化影響下，唔少男仔都興留長頭髮！講到藝人中嘅表表者，印象最深刻嘅一定走唔甩有日本男神木村拓哉份！當年一頭長髮，加埋木村靚仔嘅外表，真係風摩萬千少女心！
雖然唔知大家鍾意木村長髮定短髮嘅樣多啲，但有樣可以肯定嘅係整個90至00年代有好多潮流都係由木村帶起，其中一個話唔定就係佢極具標誌性嘅長髮！
｜F4
至於喺台灣，當然都有男藝人留有標誌性長髮，佢哋就係當年嘅F4！喺F4嘅成名曲流星雨MV當中，四子都以長髮示人，而最令人難忘嘅應該係吳建豪負離子長直髮，吳建豪亦曾自爆去整負離子嘅原因就係因為唔想特登早起set頭！
｜金城武
而台灣另一位長髮男神代表一定唔少得金城武，皆因佢英俊嘅外表再加上一頭長髮，同樣於當年俘虜幾多少女心！不過最型仔都係金城武將長髮all back，即時man爆！
｜鄭伊健
不過講返喺香港，同樣亦有唔少留長髮都好好睇嘅男星，其中一位就係鄭伊健！多年嚟，伊健都留有一把長髮，而曾經就有傳聞話伊健每逢剪短啲頭髮，星運就會開始唔順，所以佢唔敢再剪短！
雖然唔知係咪真，不過最緊要都係大家都覺得長髮襯伊健多啲！
｜吳彥祖
除咗鄭伊健，唔少得一定係男神吳彥祖（Daniel）！有網民就將Daniel喺電影《新紮師妺》入面嘅長髮Look作為例子之一，可見長髮時期嘅佢幾令人有印象！
｜張景淳
然而，除咗以上咁多位男神留長髮都咁靚仔外，網民亦都有提起依家喺TVB拍劇嘅張景淳！喺《愛回家之開心速遞》中，觀眾除咗關注佢同長腳蟹嘅感情發展外，亦都留意到佢長髮造型！
對於張景淳嘅長髮，有網民就大讚表示好耐冇見過留長髮而又好睇嘅男藝人出現。
(資料來源：網上截圖/連結)
