梁思浩、李麗蕊和陳彥行早前在網台節目，說起近期圈中出現一個「癲婆」，大家聽到她名字即聞風喪膽，梁思浩指這位女士很恐怖，四個月前已開始打聽不少男藝人的聯絡方法，又會轉貼新聞，講如果大家合作可以去荷李活，梁思浩說：「你唔好嚟搞我喇！」
李麗蕊覺得她不算太癲：「因為佢識得去搵你，如果佢嚟搵我哋兩個，就真係癲得好勻洵喇！佢都仲叫做識得搵門路，亦有可能佢根本唔係癲，詐癲納福。」李麗蕊又指有些圈中人忽然沒開工，一定有原因，可能令其他人失去「聲譽」。
梁思浩說：「我唔識佢，見都冇見過，只係有朋友同佢熟，好多男藝人開頭唔知咩事，咁有人喺圈內聊天群組叫大家小心，如果佢搵你嘅話，因為女人講一句，你就死㗎喇，佢好鍾意話人揩佢油，如果佢出嚟話你揩佢油，你估一般人會信邊個，大家喺圈中有通報，佢約你，你要小心啲，佢係分分鐘鐘屈你、嗌救命即時發癲。」
李麗蕊質疑這位女士是無中生有的人，還是博人揩油？梁思浩解釋：「佢係會頂埋嚟之後，話你揩到佢，博宣傳造新聞，因為女藝人如果冇人提，佢要搵啲有話題嘅人先可以博到新聞位，大部份女人睇呢啲新聞，都係覺得男人鹹濕，唔會認為個女人係陰我哋。」
陳彥行覺得男藝人真的要小心，因為這種流言影響聲譽，陳彥行又稱：「如果所謂性騷擾嘅新聞，一單起兩單止，再多幾單，人哋會唔會諗係唔係個女嘅有問題呀，咁同時發生喺一個人身上，有咁多男人去博佢懵，係唔係佢有問題先。」李麗蕊認為作為一個女士，經常被博懵，應該要學識好好保護自己。
此外，梁思浩又爆電視城曾經有一個女藝人被叫「妖怪」，梁思浩稱該女藝人是靚女，沒有患精神病，他續道：「妖怪覺得個個男人都係望佢對胸，佢係有啲問題，開頭大家都同佢做朋友，後期發覺佢真係有啲問題，譬如佢同一個小生傾完偈，傾得好開心，但轉頭同化妝姐姐講『佢頭先𥄫住我對波』，人哋冇做過，妖怪係用呢樣嘢去提升自己係萬人迷嘅地位。」
梁思浩回想起有次化妝高層為男藝人抱不平：「妖怪搞到個個男藝人都散開，紛紛走出化妝間，叫『怪獸襲地球』，佢認為個個都𥄫佢，佢係靚同有啲身材，有次佢走埋去，同一個六十幾歲嘅資深演員（化名：乜叔）傾偈好開心，之後乜叔開工，妖怪轉頭同化妝高層講，仲要眼濕濕咁講，化妝高層反問呢個女藝人『醒吓喇！你有病呀，有病睇醫生喇！乜叔都唔鍾意女人』，咁妖怪係唔紅嘅人嚟，應該係想自己喺電視城有存在價值。」
(資料來源：網上截圖/連結)
