ViuTV《全民造星》去年成功捧紅姜濤，今年再接再勵推出全新一輯《全民造星II》，昨日ViuTV在官網公佈參選99位參賽者名單及造型照，其中最注目的是姜大衛與李琳琳的23歲細仔姜卓文也有份參賽。姜卓文（細John）出生演藝世界，除父母都是演藝界外，叔伯秦沛、爾冬陞、祖父嚴化（姜克琪）、家姐姜依蘭、姐夫曹永廉、堂兄姜文杰和堂姊姜麗文也是演藝圈中人。
傳媒致電姜大衛，問他可支持細仔參加《全民造星II》時，他笑住反問說：「你話我支唔支持吖？」可有信心兒子取勝？姜大衛說：「當然想個仔贏啦，但輸同贏都係一個生活經驗，條路係會辛苦啲，但輸咗可以再嚟過㗎嘛，就算做生意都有機會輸，邊個話一出道就可以紅？我希望佢攞個經驗，希望條路係佢自己行出嚟，而唔係一出嚟畀人話佢係姜大衛個仔。」
ViuTV前晚開始在網上舉行「Eye Catching Idol」選舉，最多心心頭5位可直入次回合60強，姜大衛表示已與太太李琳琳給予囝囝心心支持，他說：「㩒個心心吖嘛，我哋㩒咗喇，大家都多多支持喇。」姜大衛不忘為囝囝拉票，認真是廿四孝老竇。
傳媒致電姜卓文，問他父母是否支持他參加比賽，姜卓文說：「我父母當然百分百支持我喇。」有沒有信心取勝？姜卓文：「我係抱住一個學習嘅心態嚟參加《全民造星》比賽，無論輸定贏，我都覺得努力學習過程裏邊我已經贏咗喇。」出身演藝世家，會否有壓力？姜卓文：「壓力係有啲嘅，不過我會學習點樣將呢啲壓力變成推動力囉。因為係演藝世家，所以工作方面，我都希望自己成為演藝界一份子。」
此外，王祖藍表弟、曾拍攝電影《狂舞派》及rapper的李俊華（孖八）、去年《造星》退賽的梁德忠（Tank）及落敗的何駿廷（Ting Ho）等等都有份參賽。
(資料來源：網上截圖/連結)
