梁佩瑚，89年港姐季軍，15年認識蒙古地產商人郭雲飛，拍拖8個月閃嫁，46歲那年告別盛女生涯。
一世人流流長，總會愛上幾個人渣！現年48歲的她，感情上遇過兩次愛情騙子，幸最終遇上命中注定的老公。
日前梁佩瑚在尖沙嘴接受專訪，着上在淘寶買的500元裙子，沒有富太氣燄，說話直率，是一個貼地的儍大姐，坦然面對昔日的感情重創，「遇過感情騙子，又試過呃錢啦，又試過未離婚但話畀你知離婚，跟住俾人哋老婆不停咁鬧小三，做埋啲網絡欺凌嘅嘢，用詞好抵死：『呢個做小三嘅人唔係好年輕，係老小三。』咁我覺得人哋又冇錯嘅，你做緊壞事喎！」
知道做了第三者後，梁佩瑚即扯火責問當時的男友：「佢話分開咗冇一齊住，咁都係呀，你唔可以陷我於不義，我哋係經朋友介紹，介紹時候話佢同太太分開咗，佢就話我冇問清楚，我點知啫，分開咗一般覺得係離婚，點會分開咗（意思）係分開住 ，我鬼知你咁多咩，大意囉！好在時間唔長，拍咗兩、三個月，佢屋企人好快發現。」
至於呃錢的那個男友，梁佩瑚谷氣說：「唔好講呃咗幾多錢，都係自己大意囉，遇人不淑，嗰個仲要周邊朋友都俾佢呃，佢連阿妹都呃，呢個拍咗兩、三年，梗係傷，而家諗番往事一樁，人生嘛。」
雖然遇過兩次愛情騙子，但猶幸對愛情沒失去信心：「我唔係硬淨，睇得開囉，因為我老公都話，我同佢好似，我哋都係瞓得好好嘅人，佢話有心事嘅人瞓唔到覺，但我哋有乜唔開心，捱一個禮拜度，搵方法解決。我生完日都49歲，好快已經半百，經歷咁多嘢，當時覺得點解咁不幸，而家睇番咁咪小心啲囉。」
性格樂觀的她說：「如果唔遇過咁嘅事情，識我老公時，唔會第一時間問佢係咪離咗婚，佢即刻send晒離婚協議書畀我，睇到佢好有誠意。」跟老公一見鍾情？她說：「佢話第一次見到我就鍾意我，但我就：得唔得呢？同埋佢好鍾意講嘢，我覺得男仔應該沉實啲、cool啲、型啲，我同佢食飯，佢不停說服我嘗試同佢拍拖，覺得佢又幾有誠意，咁咪試吓囉。」
兩人拍拖8個月閃婚，老公如何令她有信心？梁佩瑚說：「雖然受過兩次傷害，但我識老公時都45歲啦，唔通我之前只拍過兩次拖咩，有遇過衰人亦有遇過好人嘅，會諗係咁啦，硬係會有時運高時運低嘅時候，好似我識老公前，嗰排好多人話：『你仲未結婚呀，介紹人畀你識好唔好？』好多女仔會話：『唔好啦，單身都幾好呀！』但我唔會囉，永遠人哋話介紹，我：『好，幾時？快啲。』我好積極嘅，我唔係恨結婚，我係想有個伴，因為睇到爸爸年長，佢一個人係孤獨嘅，同埋朋友圈裏面，成日見到一對對夫婦，有時夜晚返屋企，你想飲酒有人share一支冇咁醉，傾偈時身邊有個人。」
梁佩瑚冇選錯，婚後生活很開心：「有乜事有商有量，有時遇到突發事情一齊面對，有次有人侮辱佢，我好難受，原來佢係我老公之後，變咗係自己嘅感覺。以前一個禮拜飲5晚酒，佢而家只畀我飲兩晚酒，我哋40幾歲先識，要珍惜餘下時間，點樣享受未來日子，最好方法保護好身體。」身在福中的她笑說：「唔開心嘅都有㗎，老公係白手興家，後生好勤奮工作，捱過吓，而家好鍾意enjoy life，成日要去玩，但我唔係，成日去旅行好攰，譬如上次（4月）我哋未去完泰國，佢已經問5月去邊，6月又要去溫哥華，佢話好悶，我話好煩。」
老公是地產商人，做了少奶奶的她沒變名牌奴隸，反而在淘寶買衫，「我覺得衫呢，有時成日影相po社交網，着嚟着去幾件好悶，淘返嚟着完又另一個網站賣出去，幾好先，又環保，唔使屋企塞大堆衫。除咗衫之外，呢兩個豬狗（公仔）都係淘返嚟，我老公屬豬，我屬狗，我見到呢啲屋企擺設都會買。」
(資料來源：網上截圖/連結)
