港府拒絕撤回《逃犯條例》修例引起連串示威行動，部份藝人在社交平台發聲，連前政協「汪阿姐」汪明荃亦在IG點讚關於反送中的新聞，日前汪阿姐承認畀like並非錯手，自己都關心這些新聞，對於早前有藝人疑「彈弓手」，汪阿姐亦解釋藝人需要對言行舉止負責，不過許多事要視乎當事人決定，刪除或保留都是個人決定。
楊明亦為自己發言負責，今日在IG再次澄清自己的立場，留言：「我冇評論過啲和平示威者，係有人斷章取義，心水清嘅人都明白我係話緊片中掘磚，圍記者、鬧記者嘅人。我唔需要其他人砌一個立場畀我，我嘅立場好清晰「和平」、「反暴力」。希望大家一切安好。」
他早前被前港男梁裕恆（Flow）擺上枱，貼出WhatsApp群組截圖內容，見「M.Y」看到一段有示威者挖磚頭影片後即回應「佢老味成班癲X咗」，另外兩張截圖見到有人陸續離開群組，M.Y再留言「嘩，走兩件」，附以4個笑到喊的表情圖案，Flow指警方多次濫用暴力，斥楊明態度過份，又稱有兩位TVB工作人員憤怒退group，「楊明點解可以用一個咁嘅態度去對待呢件事？『嘩哈哈 走兩件』呢句說話，呢個態度，我認為十分輕佻」。
其實楊明昨日出席活動再三強調自己沒罵和平示威者，只是鬧掘磚的人，他解釋：「我哋喺個group度講嘅嘢，就有人攞咗嚟斷章取義，我唔知佢係有啲咩用意，咁大家喺group度都算係朋友嚟，新聞出咗街之後，呢個群組刪咗，好多同事都覺得唔舒服，世界上有好多種人，每人都有唔同嘅目的，我唔能夠管理晒所有人，人哋要咁做都冇辦法。」
(資料來源：網上截圖/連結)
