【神隱一年】謝婷婷誕女後終於蒲頭 激罕晒Cute爆囡囡1/3面仔

36歲的謝婷婷在上月2日，突然在社交網宣佈誕女100日，沒有透露爸爸身份，連謝賢都未見過自己孫女和婷婷的另一半，好神秘。婷婷亦好保護女兒，只是上載手BB的手仔和腳仔相；日前為了答謝梁詠琪送BB衫，婷婷亦罕有地貼上囡囡1/3面仔，見BB女肥嘟嘟，皮膚白滑，擁有尖下巴，嘴仔細細，好精緻，婷婷都忍不住讚：「Too cute！」

神隱一年的婷婷今日終於蒲頭，在IG story用filter玩了兩個不同造型，太陽眼鏡Look和藍戰士Look。婷婷穿上一件間條睡衣，但胸前的衫鈕開到好低，變成低胸裝玩自拍。她疑似剛起床，未有化妝，但慶幸有filter整靚相功能，令婷婷可以不費工夫，便可以擁有濃密眼睫毛和深黑眼線，她笑言希望自己一起身便可以咁靚靚。鏡頭下的婷婷確實充滿自信，昂頭自拍不同角度，見她狀態大勇，跟未生BB前分別不大。