現年45歲的陳煒曾經歷過婚姻失敗，單身7年，最近感情終於有着落！傳媒發現，於上周六（6號）在峇里一個醫學研討會上，見到陳煒陪伴一位六呎高的猛男醫生到場，在酒店浪漫手牽手，好有初戀feel。
當日陳煒打扮得好端莊，穿上一條長裙襯白色外套，心口掛住一個工作證件，全程坐在台上陪住醫生男友聽講座。這個醫學研討會在峇里一間五星級酒店的會議廳內舉行，由7月5日至7日，為期三天，當日下午12時許，見陳煒與醫生男友一同坐在台上，有幾位醫生輪流發言，同陳煒一齊嚟嗰位醫生都有演講，陳煒就用手機幫佢拍攝，好專注。研討會大約一小時後結束，眾人在台上合照，陳煒都有份。
陳煒全程笑到四萬咁口，她先輕輕搭住對方膊頭，示意回頭一望。兩人傾了幾句，陳煒便熟練地伸手欲拖住醫生男友，但由於當時二人有少許距離，醫生男友便反過來捉住陳煒的手腕，兩人拉扯一會，最後合體，十字緊扣返回台上。
根據研討會的網頁資料顯示，與陳煒同行的醫生名叫陳國強（Dr.Aldous Chan）。年約40歲的Aldous，據悉都是失婚人士，去年6月與黃智賢和另一位戴醫生合資在中環開設醫學美容中心，開張當日陳煒亦有盛裝到場，二人好可能就是在當日認識。而陳煒與黃智賢一向好老友，合作過好幾部劇集，黃智賢曾說過會幫陳煒物色好男人：「我幫佢留意緊嘅，但佢係冠軍級人馬，要有番咁上下先介紹得。」估唔到，黃智賢最後都能成功牽紅線。
被問到是否有新戀情？陳煒今日以短訊回覆傳媒：「了解中，多謝關心。」
報道出街後，陳煒終承認戀情，並說：「收到好多朋友及傳媒朋友嘅祝福，好多謝大家咁關心我！我同陳醫生的確係年幾前一次活動上認識，直到幾個月前，忙完自己手上嘅劇，大家先再有聯絡返，真係啱啱先開始，雙方了解中，希望各界都俾啲空間我哋，多謝各位！」
(資料來源：網上截圖/連結)
