上月誕下幼子李奕霖（Ryan）的胡杏兒，產後首度復工到馬鞍山出席活動，剛坐完月仍未完全修身的她，穿着長袖外套，表示正在努力Keep Fit中，目標希望再減多十磅，她說：「細仔算幾易湊，不過好大食，一肚餓就喊得好犀利，呢段時間我好似個餵奶機器，不過咁都好，會瘦得快啲。」
杏兒又稱哥哥李奕霆（Brendan）都有幫忙照顧弟弟：「佢都好鍾意細佬，平時會好溫柔咁摸同望住細佬，但有時又突然會呷醋，所以佢心情應該好矛盾，我哋喺旁邊睇就覺得好好笑。」剛坐完月的杏兒，問到老公可有什麼獎勵？她說：「獎勵又未有，不過佢有問我想去邊度？其實我坐咗成個月都有啲悶，有時間都想出吓街。」
問到可有計劃想追多個囡囡？杏兒直言：「其實有，不過暫時想睇下兩個湊唔湊得掂先考慮，而且生唔生女係上天安排。」 她又表示暫時以照顧囝囝為先，工作方面主要出席活動為主：「其實我8月尾都要去美國登台，到時都要飛成5、6日。」可會不捨得離開囝囝？她笑言：「第一個仔出世嘅時候會唔捨得啲，而家習慣咗其實都還好。」
(資料來源：網上截圖/連結)
