吳岱融潛水發生意外 一度呼吸困難兼頭劇痛

131

吳岱融日前隨晨曦明星足球隊到沙巴踢友誼賽,之後與太太鍾淑慧和林韋辰等留在沙巴度假。不過大前日岱融在沙巴潛水時發生意外,一度呼吸困難、頭部劇痛,最後要即時入醫院醫治。

傳媒聯絡到吳岱融,原來他在大前日入院,經醫生診治後已於當晚出院。吳岱融說:「開始本來諗住係浮潛嘅,點知去到原來係深潛,因為玩咗兩日又飲咗啲酒,最主要係我冇留意到自己傷風未好,拍《大醬園》拍咗兩個幾月,有輕微中暑同埋傷風未好,鼻塞同傷風未好原來係唔可以潛水,自己忽略咗呢一點,咁就走咗去照落水,落水之後開頭做晒啲基本嘢,落到廿零呎,開始覺得自己唔係好對路,個頭好似想爆炸,因為鼻塞所以減壓唔到,咁喺水嘅時候自己可能急咗少少上去,有個掣一撳就會急升上去,啲潛水輔導員即刻stop咗我,當時個頭反壓唔到好似爆炸咁,當時嘅我係唔知道發生乜嘢事,淨係覺得好難呼吸,個頭好痛好爆,上咗水一路都頂唔順,返到酒店個頭一路keep住好痛,我又擔心唔知係咪血壓太高,所以諗諗吓都係覺得唔對路,我自己入咗醫院check check,醫生叫我吊鹽水,嚟緊我返香港都要照一照。」

「但呢段時間我都要睇睇,因為唔可以上飛機住,而家我講緊嘢個頭都『發吓發吓』,所以鼓勵啲朋友一定要了解吓自己身體狀況先好去潛水,捱夜同食得飽得滯,尤其傷風鼻塞千祈唔好潛水,我呢次真係好大教訓。」

吳岱融有很多次潛水經驗,今次並非第一次,他又表示慶幸由頭到尾有教練在旁,見他撳掣上水升得太急促,所以上前阻止,他說:「我可能升得快咗少少,所以都個頭好似爆炸,好彩得instructor阿Jack沿途睇住我,我潛咗落20幾尺,係佢拉番我上船,當時基本上我都控制唔到自己呼吸,好彩得佢拉番我上來。我都要講聲多謝阿Jack,真係我救命恩人,如果唔係我老婆都見唔到我。」

鍾淑慧就表示當日沒有隨老公潛水,所以不知道老公入院,由於有數小時失聯,所以十分擔心:「總之就嚇死我,呢啲真係唔講唔知,而家夏天啲人好鍾意玩潛水,如果冇經驗,真係唔知傷風可以搞到咁大鑊㗎。佢而家返嚟都要body check,因為個頭一路刺痛,尤其係佢一激動講嘢同興奮少少,個頭就即刻刺痛,所以返嚟要照吓個腦。」

(資料來源:網上截圖/連結)