【元朗恐襲】何韻詩同元朗有淵源 揚言明日郊遊搞流動簽書會

警方昨向周六（27日）元朗遊行申請人鍾健平發出反對通知書，鍾提出上訴，不過承認得直的信心不大。今日有元朗居民申請，以另一路線在同日遊行。兩場遊行申請，都源於7.21有大量白衫暴徒拿武器襲擊市民，更湧入西鐵元朗站及車廂追打。

何韻詩今日突然興致大發，在facebook開post講到自己上一輩的親人都在元朗長大，自己童年亦經常到元朗，她揚言明日打算到元朗遊山玩水：「唔講大家唔知，話說我細細個呢，都成日入元朗，因為我阿爺仲在生時間住喺元朗，我老竇同啲阿叔啊姑姐啊都係元朗大嘅。咁最近大家成日提起元朗，我突然都有少少nostalgic，諗住聽日星期六不如入去遊山玩水重拾吓童年回憶啦。新界咁多好風景，遊山玩水帶支行山枴杖都好合理啊係咪？地方空曠又會特別曬，帶把遮都無妨。」

昨日有人希望阿詩在元朗開握手會，阿詩今日亦說可以流動簽書：「書展剛剛完，上網得知好多新界嘅朋友覺得遠無嚟灣仔，最近都有人溫馨地要求我嚟元朗同大家見面。咁既然一場入到嚟喇，無理由唔順道做個見面會啦。哎呀但咁急又book唔到場，無辦法之下，唯有轉做《有緣千里能相會見到就見流動簽名會》啦。拿，流動㗎，無集結㗎，無約實㗎，唔識㗎，有緣見到㗎咋。我深深明白到，香港人平時都好鍾意行街追星乜乜乜，就連行山都鍾意追星，咁星期六大家又點可以錯過嚟野生捕獲我嘅機會呢。」最後阿詩亦呼籲，入夜後要離開元朗，以免找不到路回家。