鄭秀文（Sammi）上周六終於完成13場「FOLLOWMi鄭秀文世界巡迴演唱會」，正式鬆一口氣。完騷後，Sammi已漏口風表示會去旅行休息，但被問會否與老公許志安同行，Sammi就避答，只表示會和朋友去。
不過，Sammi早說過「不放棄對方」原諒老公許志安出軌偷食黃心穎，辛苦完成演唱會去嘆世界，又怎會冇預埋安仔？今日下午約1時40分，傳媒讀者分享她在機場捕獲Sammi、安仔甜蜜出發去旅行的照片，而同一時間傳媒亦發現張衞健和老婆張茜現身機場。
讀者表示：「今日大約1點40分左右，見到Sammi同安仔，佢哋同我一齊上咗架無人駕駛列車，然後喺40-80號落車。」從照片所見，穿皮褸全黑打扮的Sammi今日素顏沒有化妝，她將頭髮束起及戴上太陽眼鏡，而安仔則揹了一個黑色背囊，穿藍色牛仔恤衫襯牛仔褲。安仔戴咗口罩，見佢上車同Sammi密密斟，架車唔算多人，但Sammi都有四圍望，讀者舉高電話佢都有望一望，但佢哋落車時就手拖住手咁行。
據悉，Sammi今次除與老公安仔同行，張衞健和老婆張茜都是旅伴，但相信Sammi為怕4人齊齊現身機場會太張揚，故「張氏」和「許氏」決定分開在兩個機場大樓入閘，上機後才會合。本報亦收到消息，4人今次目的地是英國，估計他們會順道探望已移居英國的雷頌德（Mark）及太太梁家玉。
今年4月，傳媒爆出安仔「偷食」黃心穎，在車廂連環攬啜錫，雖然安仔即時開記者會認錯及停工，但依然被封賤男，部份Sammi迷至今仍未原諒他背叛偶像，反而Sammi早已釋懷，而安仔13場演唱會亦都有到場，坐在後台為Sammi打氣，做她最強力的後盾，二人用行動努力修補之前「安心事件」在他們的婚姻造成的裂痕。
(資料來源：網上截圖/連結)
