有網民發起8月5日大三罷，一呼百應，繼杜汶澤的網台「喱騷」決定力撐外，上巿公司老闆袁彌明今日也宣佈旗下十間「彌明生活百貨」都關門響應，在上環開設餐廳「慢煮兩餐」的吳啟明也決定下周一罷巿。
《逃犯條例》的修訂今年6月在立法會恢復二讀辯論，網民發起於6月12日罷工罷市罷課，吳啟明當日都有支持，餐廳拉閘休息，並於閘上貼出寫上「本月12日罷巿一天，愛國愛港，支持反修例」的白紙，明確表態。其後特首林鄭月娥表示會暫緩反送中條例，吳啟明就未有再評論事件。但過去兩個月遊行示威不停，警民衝突加劇，社會撕裂。尤其7.21爆出元朗恐襲，白衣人殺入西鐵站無差別狂打黑衣人、巿民和記者，令吳啟明非常心痛。
吳啟明今日決定8.5會罷巿，他今日接受傳媒電話訪問時說：「其實自6.12支持過，我都冇再表態，政府講咗唔執行，不過7.21元朗恐襲太離譜，我真係睇唔過眼啲白衣人係咁無差別打人，竟然冇警察出嚟維持秩序同處理，白衣人行為過份，政府真係好唔公道，一方面又係咁拉啲示威者，連機師都拉，有男女只係經過扶起一名少女又拉，警方執法又唔拉白衣人，所以下周一我哋餐廳都會罷巿。」
過去兩個月每周都有遊行、中西區又爆嚴重警民衝突，吳啟明坦言餐廳生意也受到影響：「呢排生意大跌，我哋做fine dining，食靚食材，不過社會氣氛咁，仲邊有人有心情出去食飯。」吳啟明不肉赤賺少了，他續說：「我希望社會安寧，政府要對巿民公平啲。」下周港島區都有集會活動，吳啟明表示在中環威靈頓街的另一新店剛開業：「我交咗畀三個年青人打理，佢哋係『黃絲』，佢哋都喺網上發佈咗店中會開放畀示威者入嚟休息同飲水，如果有人參加完運動太攰，又或受傷都可入嚟休息吓。」身為老闆的吳啟明非常默許店員的決定。
(資料來源：網上截圖/連結)
