逆權運動抗爭至今，各區遊行遍地開花，今日是將軍澳反送中大遊行，市民由寶翠花園出發，終點是將軍澳單車館公園。雖然遊行路線不經無綫電視城所在的將軍澳工業區，但基於早前有網民發起反紅媒行動，無綫新聞被指報道偏頗，有連登網民昨晚在討論區開帖，呼籲大家今日千祈唔好去圍TVB，爆料指內部通知職員不准返公司，「講到明邊個星期日返公司就有嫌疑」。
連登仔昨晚在討論區緊急爆料，指今日去圍TVB零作用：「內部已通知我哋職員聽日唔准返公司，因為全電視城唔開放，講到明邊個星期日返公司就有嫌疑，聽日所有廠都唔會開，唔會有任何拍攝，新聞部我唔知會唔會返，因為銅鑼灣都有新聞部嘅分部，聽日入TVB完全係伏嚟！千祈唔好中伏！我預計聽日電視城會落閘，圍TVB係對入面完全冇影響，因為唔會有任何高層同藝員喺入面！」
網民議論紛紛，有質疑可信性：「影響咁多同事應該要有白紙黑字啦，樓主影張通告嚟睇先」亦有疑為TVB員工加入爆料，貼出一張7月28日電視城的門口相，留言：「雖然嗰日轉晒去其他地方遊行，但公司都係落晒閘，今日8月4的確係放晒大部分員工，唔使返工。」
今日中午12時許，傳媒走到將軍澳電視廣播城門外，見職員出入口已拉上鐵閘，旁邊的城巴出入口亦有一半拉上鐵閘，至於後門出入口就全部拉閘，只剩3名保安人員駐守。記者向在場保安了解，他說：「今日冇人返工。」據了解無綫新聞部有百人仍在電視城照常工作，部份記者則外勤，有TVB新聞部同事說：「佢哋唔係完全冇人返工！」而李寶安則回應傳媒稱」for small details, please refer to our PR. Thank you.」
據知無綫昨日已口頭向員工表示今日不用返工，而所有的員工證，在今日凌晨2時後已不能出入閘，只剩下少數員工預先批准可以用卡機入閘，其他仍需向保安員作登記，才可以進入電視城內，其間記者亦見有零星的幕後人員返工。
(資料來源：網上截圖/連結)
