賭王四房大女何超盈昨日為哈佛高材生未婚夫辛奇隆（Thomas）誕下8磅重B女，何家上下相當開心，已向親友報母女平安，今日下午2時30分左右，四太梁安琪離開養和醫院，雖然當時她一臉疲態，不過仍難掩喜悅的心情，她說：「我噚晚見咗個孫，首先要多謝大家為超盈開心，亦更加為我開心，事實上係感覺到超盈係大個咗，當荷包蛋出世，我覺得以後唔使再接受記者訪問，因為已經做唔到咁多嘢，要湊孫，忙到變咗一pat嘢，唔夠時間。」
她亦笑稱自己眼腫腫的原因是睡眠不足，笑問孫女是否很「墜手」，與及何生又是否已經見了孫女，她笑說：「你諗一諗呀，何生應該見咗，多謝大家。」再問何生有否幫手餵奶？她說：「何超盈會搞掂，所以佢真係大個咗，我自己就老咗，（有冇教路？）醫院同朋友都有好多意見，我自己嗰啲已經過咗時，所以咪幫手湊，事實上生小朋友唔係簡單嘅事，教兒育女更加要畀心機，你哋個個都咁高大威猛，都要諗吓你父母生你哋嗰種感受，大家都經歷過，希望荷包蛋快高長大，最緊要係健健康康，由有咗到出世前一刻，超盈都好擔心，我知道佢好感動，不過我唔入得產房。」
至於準備了甚麼禮物送給孫女？她則說：「呢個遲啲先喇，我而家要出去開會，今晚唔嚟，但係我其實成日都喺呢度，要照顧何生，樓上樓下，何生更加緊要。」三太離開前亦被問到知否超盈生了BB，她表示知道後便匆匆上車離開。另一方面，超盈的好友陳柏熹亦有探BB，他表示自己從美國返港便立即來探B，問到是否昨晚已知道？他即說：「唔知呀，不過我睇咗BB女啲相，似媽咪，不過我哋傾偈嗰時，超盈仲有啲暈暈哋，Auntie最開心，唔知佢有冇離開過醫院。」禮物方面，身為契爺的陳柏熹說：「送咗粒鑽石畀佢，等佢將來大個女再決定點樣用，之前超盈叫我幫佢囡囡設計手袋，我仲設計咗啲月餅盒畀佢用嚟送禮，將來睇番都識得笑，不過真係好感動，心情亦都好複雜，估唔到佢會快過我！」
(資料來源：網上截圖/連結)
