34歲張致恒（Steven）今日跟未婚妻雯雯奉子成婚，兩人在1號風球下到律師樓進行註冊儀式，3個月大的兒子天寶見證父母成為合法夫妻，一家三口打風都打唔甩，幸福滿瀉。
今早10時50分，Steven和未婚妻坐白色七人車到達律師樓，同車有一名女子拖着喼，工人姐姐就推着BB車，還拿着一個裝着氣球的袋，用作佈置現場。抱着兒子的Steven身穿禮服，雯雯着白色裙子披外套遮胸口，記者叫她除外套拍靚相，Steven說：「我哋遲到啦，一陣先。」雖然今日是大喜日子，雯雯不知是否緊張關係，面露不悅，沒甚笑容。Steven再說：「我哋已經遲到啦，可唔可以畀我哋上去先，阿仔有啲呆呆哋。」不過記者拍照時，天寶眼仔睩睩周圍望，十分精靈，圈中人只有張彥博出席觀禮。
註冊儀式完成後，11時40分，Steven首先落樓見記者，問到簽紙是否好感動？滿頭大汗的他說：「始終人生第一次，緊張多啲，噚晚冇乜點瞓覺，加上阿仔有啲唔舒服，扭計唔肯瞓。」問到愛的宣言？他說：「都冇乜，用行動去表達自己，一直都呃咗佢好耐，其實我哋上年開始同居。」問當時是否亦跟舊愛梁皓恩（April）同居？他否認：「唔係，我已經搬走咗，只係有啲嘢未搬走。」問當時跟April分手了嗎？他坦言：「未分，呢件事對好多人都好困擾，太太都覺得好困擾，我哋一家都受到好多攻擊，又鬧我哋又鬧個仔，但我好想用自己證明畀大家睇，我會做番好，為咗家庭會努力，希望大家畀多次機會我，對唔住，我騷擾咗大家，嚟緊我會好錫我太太同個仔，會畀阿仔有一個好好嘅成長環境，會好好愛我太太，一心一意。」
問到太太有甚麼感受？雯雯微笑說：「多謝。」對於Steven指會洗心革面，問對老公有冇信心？她點頭微笑，Steven代答：「佢都好緊張，人生第一次，太太噚晚都係完全瞓唔到覺。」之後有甚麼慶祝？他指會跟家人去飲茶，今晚自己煮飯。
問到工作是否全部叫停？會否擔心生活有問題？他說：「其實未完全停晒，過咗中秋會去象山拍戲，係一部內地電影，拍一個月，其實之前都接咗一啲嘢做，希望越做越好，自己會改過反省自己，而家每日照顧太太同個仔，一日三餐都係我煮，之前自己犯咗一個好大錯誤，對太太一定有影響，自己做錯咗，影響好多人，多謝身邊朋友不離不棄支持我。」
有否通知朋友出席儀式？他說：「本來諗住搞好小型嘅簽紙儀式，可能一年之後有時間又儲到錢，下年9月2日搞一個婚禮囉。」有否通知關智斌？他說：「有啲嘢在心中，我冇通知好多人，唔想咁多人受到困擾。」為甚麽家姐（前歌手張詠恩）今日沒出席？他說：「本身家姐話趕過嚟，但佢好多嘢做，最終都係嚟唔到，媽咪就喺荷蘭趕唔切返嚟。」
至於蔡卓妍、鍾欣潼等在IG取消關注他，Steven坦言：「識咗咁多年，佢嬲我都好明白，想同佢哋講聲對唔住，我令到佢哋咁嬲咁唔開心，請原諒我。」會否主動致電聯絡她們？他說：「過一段時間平息咗，再同佢哋道歉。」
今年7月，Steven在社交網宣佈已為人父，未婚妻雯雯為他誕下兒子天寶，忽然變舊愛的梁皓恩晴天霹靂，在IG斥Steven欺騙感情，隨即Moon、S小姐和C小姐都蒲頭踢爆男方一腳踢多船。最後Steven在網上公開道歉，得到雯雯原諒，齊上齊落，今日共諧連理。
(資料來源：網上截圖/連結)
