「我聽過最恐怖嘅係，有一次，有一程機，同啲同事做完Service之後傾偈，講吓反送中、警察嘅嘢，其中有一位同事偷偷地錄音，佢話，『我其實已經錄音，我會send畀公司』」，而當日聊天的空中服務員，回去都要見管理層。Karma（化名）在國泰當了12年空姐，一直力撐公司，直至自己疑因網上政治言論被解僱。
「星期一至星期五，每日都會聽到，不停有人被炒，（單計）炒我嗰日總共炒咗20人。」她估計這數星期以來，已有近百人捲入白色恐怖漩渦，有些人受調查，有些被解僱，最長年資的有22年。有兩位前資深員工向本報透露，有數十人因此事而離開集團。
Karma大爆，於國泰鼓勵篤灰、IT部門專門嚴查員工fb、Instagram之下，只要有人篤灰，國泰不用調查下，裁走員工機會超過90%，更有一向沒政治取向的員工因而無辜被裁走。對於裁員數字，國泰發言人表示，不會就員工內部事宜作出回應。Karma指，現時國泰員工茶餘飯後的話題，是「今日有邊個俾人炒咗？」，士氣「已經完全冇哂，冇人會再想幫公司，每一日每一個人只係諗，唔知幾時會到我」，若找到其他出路就會離開。Karma甚至聽過，有朋友天天都作最壞打算，「每一班機，都當係最後一班機咁飛」。
不能再飛的空姐「我朝早仲返緊工」
Karma的最後一班機較她想像中來得遲。她被炒前一星期已被管理層召見，會上拿出數張社交媒體截圖，又要求她確認是否有讚好批評警察的帖文。她指已做好心理準備，豈料高層給她數日解釋，她其後復飛。暴風雨前總是特別平靜，一周後她工作的短途航班甫一降落，就有人上機，命她馬上回國泰城。一回到公司，管理層即時拿出解僱信，面對不斷追問的Karma，只拋下一句「解僱是公司決定」。
她自言自己並沒犯法，也沒打算煽動其他人參加非法遊行示威，只是行使應有的言論自由，在公司明言要「慎用社交媒體」後已刪去社交媒體帖文，不明白為何會因此被炒，「我啲post係6月、7月時嘅，8月時已經刪除，你唔可以追討返我兩個月前嘅言論」，批評公司翻舊賬。
Karma質疑公司是立場先行，對待親中員工相當鬆手，卻把反送中的員工往死裏打，「我唔知公司尺度係點，但畀員工嘅感覺係，你只要係黃嘅話，被炒嘅機會係100%，而你係藍嘅，支持政府、支持警察，你就一定冇事。」現任國泰港龍行政總裁丘應樺今月初被揭發，7月時曾在個人facebook，轉載一篇把議員形容為「曱甴」的帖文，並加上笑喊表情符號。對於有否調查事件，國泰將之與裁員消息一併回覆「不會就員工內部事宜作出回應」。
文革再臨 敵友難分
空姐工作上很少會碰上熟稔的同事，大多只有一面之緣，「可能今次見完佢，下次係兩年後，連名都唔記得。」交情不深，同事間也因此沒太多機會探知對方底蘊，為求自保，員工寧願選擇沉默，「我聽過最恐怖嘅事件，係大家做完服務後傾起反送中同警察，但有同事偷偷錄咗音。」該同事更當場自爆，「佢話我其實錄咗音，會send返去公司」，即時把其他人嚇呆，最後有份參與討論的機組人員被管理層召見。
國泰早前發信，提供電話和email鼓勵員工「篤灰」，「（內部文件中）話你可以去舉報其他同事，所有資料保密。」敵友難分，Karma指現時員工都寧願對大家敬而遠之，「你根本唔知邊個係鬼。大家都係做完嘢，就自己食嘢，唔會講任何嘢，落機都唔會一齊食飯。」她指以前同事關係親密，「就算唔熟，去到其他地方都會成班人約出嚟，開開心心食個飯。依家連飛機上面都唔夠膽傾偈，唔會一齊食飯行街，只係會留喺酒店休息。」
即使員工沒有表達其政見，都有可能無辜受牽連。Karma指，自己身邊就有近乎不用facebook，又沒有強烈政見的朋友被炒，質疑國泰根本沒有調查，只要有被舉證就照單全收即炒，「真係完全老屈，佢冇post過任何野，又冇去過遊行。現時只要有一個人舉報你，公司（好似）就已經好有理由去炒你。」斷頭台隨時落下的後果是，員工不敢開罪人，做事時綁手綁腳，「可能我今晚同你飛咗一程機，有啲不愉快，跟住我就將你個名放上去，跟住你被炒嘅機會率可能係9成幾。邊有可能會唔驚？」
白色恐怖連私人生活都不放過，Karma的朋友紛紛改掉社交媒體上的名字，刪除相片，「而家facebook上面，我都已經唔知係邊個。朋友啲相都已經變哂黑色，名已經唔係原來嗰個名，相都睇唔到。」Karma指，令她被炒的社交媒體帖文其中有一篇是限時動態，只有朋友可見，懷疑是一個和警察結婚的空姐篤灰，「公司（以前）話It’s the people that makes an airline，大家係一個團隊咁去做一架機，但而家係鼓勵我哋去report其他人。」她說自此以後，不會再有人拿心出來做事，「大家嘅信心已經被打爛」。
一場錯愛 「自己好天真」
「我信錯咗公司，信錯咗人。」空姐這份工作曾令Karma引以為傲，「以前啲人問我你做咩工，我唔會只講做空姐，我會講，我係國泰空姐。」曾經多自豪，最後就多失望，「我覺得之前嘅諗法好可笑，自己好天真」，說罷眼角淚光閃閃。
Karma坦言，若國泰炒人是商業決定，她會理解，「我有聽過，我個名上咗中國民航局，意思係我冇辦法飛越中國領空。如果你話畀我知係呢個理由，我可以嘅，因為我已經幫唔到公司做嘢，所以我要離開；但如果你只係話畀我知，你完全唔會畀一個原因我，話畀我知發生乜嘢事，抹煞我咁多年的努力，我覺得好無稽。」她估計，國泰不願就炒人提合理解釋，可能是怕未來會有人循法律途徑追討。
早前國泰被中國民航局發出重大航空安全風險警示，行政總裁何杲落馬，Karma當時仍力撑公司，「高層好似保護緊大家咁，我都想保護返公司。」當時有傳行政總裁何杲被中國要求交出罷工名單，結果何杲選擇辭職，力保員工。她為中國打壓國泰深深不忿，同事都同仇敵愾，「（嗰陣話）要齊心幫公司。國泰係香港人公司，我哋一定要撐住，唔可以畀公司冧。」立法會議員譚文豪其後亦忍痛放棄機師工作，希望保護國泰，願「航空界政治風暴至我而止」。直至那時候，Karma仍然相信國泰，因為早前公司有任何困難，員工都共渡時艱，幫公司撐下去，「我都做到嘅時候，我哋有困難你都會保我哋，但係原來結果唔係咁。」
Karma覺得國泰突然變得好陌生，「國泰表現到畀大家睇，點解我哋一開始唔想送中條例通過。因為你只要通過咗，中國話你有罪，你就有罪，係唔需要調查。我覺得公司一直都有言論自由，但突然變到好似一個中國咁。」她說，香港已不再是以前的香港，歷時3個月的社會運動，把社會的遮羞布撕掉，「可能之前都有人因政治言論被炒，而大家一直睇唔到。今次反送中就將醜態展現眼前。」
Karma坦言，自己被炒的一刻，有後悔在社交媒體發表言論，「但而家諗返起，我再返去兩個月前，我都應該會照做。我真係唔覺得自己做錯咗啲乜。」她說，有擔心暑期作業還未完成的小朋友站在前線，和他們相比，自己還差得遠，「我都係冇咗份工，佢哋係賭上自己嘅前途。」
國泰的故事，是香港漸漸變成中國的縮影。不講證據，鼓勵群眾鬥群眾，向中國「跪低」的國泰，還有沒有未來？Karma長嘆一口氣，沉默半晌，「佢嘅未來，可能就係中國畀佢嘅未來。」
(資料來源：網上截圖/連結)
