【追仔成功】兩女之母關伊彤意外再懷孕 患妊娠鼻炎未敢張揚喜訊

36歲關伊彤11年嫁給演員林紹奎（小巴），並育有7歲多長女Marina和4歲多二女Eleena，關伊彤低調陀了第三胎，這胎是男嬰，追仔成功，預產期在下月21日，囝囝有機會與老公小巴同日生日。

關伊彤陀仔約7個多月才傳出喜訊，她接受訪問時，才解釋冚密原因：「呢次我真係意外有咗，頭個幾月唔知道有咗，陀得好辛苦，陀仔同陀女真係好大分別，熱到狂爆瘡，我又唔知有咗，仲食皮膚藥、食抗生素同類固醇，後來知有咗先停藥，我最初見爆瘡仲係咁食涼嘢，又綠豆沙，好彩冇嘢，我哋而家同BB改名叫佢做『綠豆仔』，前排太熱，我又患咗妊娠鼻炎，鼻敏感同鼻竇發炎，搞到一邊耳仔聽唔到，我又食中藥同西藥調理，開頭都唔敢話自己有咗BB，後來差唔多狀況OK，我個肚真係好大，我先同大家講。」

問到家中兩女是否很喜歡有新成員？關伊彤續說：「兩個家姐好開心，勁鍾意小朋友，我鍾意女多啲，始終返屋企係女，我都希望快啲卸貨封肚，所以一定要做足安全措施。」關伊彤希望囝囝身體健康，因為陀他初期吃了太多藥。囝囝出現可有打亂大計？她說：「當然有啦，陀嘅初期超級唔舒服，嘔到我死，要開電影吖，拍嘢吖，都推哂，身體狀況真係唔係好得，希望生完快啲收返身拍嘢。」關伊彤表示這胎因為太忙，她既要照顧兩女，老公又常不在港，暫未安排影大肚寫真。