譚詠麟（阿倫）今年6月尾因為出席撐警活動而激嬲歌迷，被歌迷鬧爆離棄。而今日就有網民在facebook留言，指阿倫今日到灣仔一間餐廳食午飯，但最後被良心食肆趕走。
網民留言表示：「剛剛係（喺）灣仔新景園食飯，排咗25分鐘入座，坐低後叫埋嘢食見到個帶住cap帽，太陽眼鏡嘅譚X麟直入舖內搵事頭婆，唔洗兩秒就走番出門口，原來係事頭婆話冇位，唔做佢生意，之後伙記哥哥大大聲講以後咪X再嚟，全場鼓掌後例牌玩下接龍。」差不多時間，另外有人開post講到此事：「原來係頭先有個成日自稱25歲姓譚嘅Cap帽啊伯走入嚟話想買外賣，然後俾店員請佢走，話唔做冇良心的人生意。」
《蘋果》記者今日下午到新景園去Fact Check（FC），餐廳正落場休息，記者問職員阿倫今日是否曾光顧？一位不願上鏡的伙記表示不清楚，指負責人不在場。而另一位同樣不願上鏡的伙記就表示阿倫今日確曾出現，並說：「佢係嚟過，但就唔係你講到咁樣，間舖你都見啦，豆腐膶咁細，出邊又排晒隊，佢入嚟話想食嘢，咁我咪叫佢排隊囉，好合情合理啫，係咪先！我叫佢排隊，跟住佢望一望，見到咁多人，出番去，就係咁簡單，成件事就係咁。」
新景園伙記證實阿倫今日曾光顧，不過當時排長龍而店面小，伙記示意要阿倫排隊。
對於網傳伙記鬧阿倫及食客拍掌，問有沒有此事，伙記否認：「冇啲咁嘅事，冇啲咁嘅事。」換言之不是因為政見不同而趕走阿倫？伙記說：「唔係，我冇理由因為一個客人而趕走一枱客畀佢食㗎嘛，係咪先，咁食嘢梗係要排隊㗎啦，好合理啫，記住呀，真係同黃藍冇關係㗎，唔好亂寫呀！」那麼阿倫是否該店熟客？伙記說：「好多年前佢係耐唔耐嚟食，但近年都少咗，佢都唔算熟客嘅。」
阿倫有段時間經常幫襯，不過近年次數減少，上年6月阿倫貼過當時在餐廳內食飯相。
至今晚食肆方面主動聯絡本報澄清：「今日阿倫嚟到拍一拍事頭婆話『兩位』，但事頭婆話：『做唔到嘞，對唔住。』就係咁，而唔係同佢講要排隊，至於其他就大家意會喇。」
