46歲的蔡少芬（Ada）今年6月宣佈懷上第三胎，估計佗B已有7個月。雖然屬於高齡產婦，但Ada仍然好有活力，間中都會出外做舒展筋骨運動，日前又約齊一班好朋友相聚，身心都Keep住健康。
毛舜筠昨晚在微博上載一張大合照，見Ada好生猛，企在後排，一手托住巨肚，一手舉V，表現得相當興奮。另外還有陳法蓉、商天娥、黃愷欣及早前患上腦膜炎曾留院兩星期的韓馬利，見韓馬利明顯比以前瘦，但望落仍然好精神，相信康復情況理想。毛舜筠留言：「友誼永固。」陳法蓉都有轉載，並說：「愛愛愛你們。」
今年8月患上腦膜炎的韓馬利，出院後閉關調理，相中所見難得出關參加聚會的她精神不錯，韓馬利今日回覆傳媒時說：「唔係㗎，我死頂，而家都好唔妥，日日都睇醫生，又中又西，食藥都食到傻咗，中西醫都話之前腦膜炎入院，打咗兩個幾禮拜抗生素，要消炎，身體機能散晒，我要有排調理，而家仲手震、腳震，最弊完全冇胃口食唔落嘢，個人好攰又失眠，都唔知睇乜嘢醫生好。」
(資料來源：網上截圖/連結)
