在廣華醫院出世，半世紀都住在廟街的印度人喬寶寶，當年參加《殘酷一叮》因夠搞笑受歡迎，其後加入無綫做藝員，放棄了在懲教署做阿Sir，在無綫盡忠職守13年，但近兩年卻零工作，喬寶寶灰爆下決定跟無綫提早解約：「十幾年緊守崗位都冇運行！」
現年49歲的喬寶寶本決定明年離港，返蘇格蘭跟家人團聚，對演藝圈一腔熱誠的他，滿以為臨走前可以有代表作，怎知卻被大台冷待：「13年喺蘇格蘭返嚟後，少咗好多嘢做，但嗰時一年都有兩個劇，慢慢一年比一年少，16年開始一年一個劇，今年直程一個都冇；嗰時王維基開咗台，我覺得我哋緊守崗位啲人應該多番嘢做，但反而冇呢啲歌仔唱，都幾灰，十幾年緊守崗位都冇運行，反而請好多外援返嚟做，或者過咗其他台返嚟嗰啲仲多嘢做。」
是否得罪高層才無運行呢？喬寶寶坦言：「我不嬲都唔得罪高層，yes sir、yes madam嗰類人，做乜角色又冇所謂，就算閒角、快閃黨我都唔會詐型。我冇怨言，始終講過2020年返蘇格蘭過悠閒生活，不過諗唔到時間會嚟早咗一年，15年同上面反映過好少嘢做，越反映越少嘢做，都失望，咪提早走囉，原本合約去到2020年7月10日，我覺得都冇乜意思，不如取消，我冇底薪，係拍嘢先出糧，成年冇拍嘢冇糧出。」
在大台13年盡忠職守，卻落得如此下場，喬寶寶說：「少少心酸，就算唔係劇集，綜藝節目都可以搵我，但都冇搵自己人，又請外援，幫你打滾咁耐，都幾灰，唔係咁開心，但冇辦法。記得有次港台《有房出租》搵我做其中一個主角，問我有冇興趣，我同無綫反映，講咗幾個月，最後都唔批，原本港台諗住我得，因為自己都冇嘢做，但又唔放我出嚟，講真我都係想多啲曝光，留番個回憶畀自己。」
在無綫多年，喬寶寶最感激監製王心慰：「可能保守得滯或者山頭多，來來去去我真係有角色做都係王心慰嘅劇集，好似《真相》做律師，《Only You》做野蠻老爺，仲有我最後一個劇未出街《黃金有罪》，佢啲劇畀好多機會我，記得有次佢搵我喺《迷》做客串角色，佢話唔好意思呀，客串一兩場介唔介意，一個監製搵我仲要講啲咁客氣說話，其實好難得，反而開心。」
在懲教署做了16年，在無綫做了13年，喬寶寶還是鍾意藝人這份工：「藝人可以做自己鍾意嘅嘢，始終紀律部隊嚴肅啲，唔可以開玩笑，我個人比較活躍，06年入TVB，但未辭職，一路拍一路返工，懲教問做明星定做阿Sir，我諗香港百幾年歷史，冇一個南亞（人）全職做演員，如果我可以犧牲長俸入娛樂圈，對其他南亞（人）有幫助，我就決定辭職。當時懲教同事都有講，《殘酷一叮》一剎那光輝，叫我諗清楚，又話我真係唱得交叉難聽，唔係諗住唱嘢搵食呀？我話都係拍嘢啫冇諗住唱歌，我估唔到呢十幾年8成收入靠唱歌，而家好多公司周年晚宴、婚宴搵我唱歌，搵到吓外快，一個月5、6單，聖誕節有十幾單，每單2、3萬，收入非常之可觀。」
明年喬寶寶返蘇格蘭，終於可以跟老婆團聚：「老婆唔喺度，食嘢唔定時，今年7月通波仔，有一條心血管塞咗99%，好在有買保險，唔係嗰20幾萬唔知點算，而家食緊藥，副作用令自己越嚟越肥，7月到而家肥咗30磅。」原來當時他曾徘徊生死邊緣：「半夜起身氣促、標冷汗、唞氣好唔順，報告話其中一條血管栓塞，喺養和做手術，之後返蘇格蘭休息一個月。」
(資料來源：網上截圖/連結)
