今年於元朗北朗選區競逐連任的鄺俊宇，與首次參選的民建聯譚煒霖競逐一席，結果由鄺俊宇成功連任，以4382票擊敗譚煒霖的2584票。票站選舉主任宣佈鄺神勝利後全場過百名市民歡呼，鄺神接過親友獻花後向全場高呼「我哋煲底見！」
鄺神大比數勝出後一度哽咽，但當記者問及他獲勝後一刻的心情如何時，他卻笑說：「我依家呢刻只係諗緊聽日仲要8點起身，要去做法律支援，總之都係嗰句，選舉完咗開心一日就算，聽日又要開始做嘢啦！」
鄺神表示，由於下午該選區投票率一度只有三成，他於下午時宣佈告急，「好多謝今晚過來朗屏天橋支援嘅朋友，真係感受到咩叫一方有難八方支援。」他表示北朗選區範圍內的朗屏邨是他的從政起點，亦是其成長的地方，感謝這區的街坊前來「救命」，認為今次選舉是向政府表明民意，「政府如果仲係當冇事發生，仲係當林鄭月娥同佢班子所領導嘅問題係完全冇問題，認為民意仍然企喺所謂主流民意呢，仍然係唔需要去做獨立調查，甚至唔需要去查元朗7.21事件的話，相信林鄭月娥先係未瞓醒嗰個人。」
今年區選泛民穩取逾半議席，鄺神認為是一次全港民意表態，泛民主派大成功，他表明除了感謝普羅市民之外，亦有賴一班反送中運動的前線手足，「呢段時間好感激我哋一班不能喺鏡頭裏面，有好多暗地裏工作（嘅人），大家明白，我哋唔會忘記手足。」
他形容今次區選為「破天荒」，「由朝早會打蛇餅排隊去投票，到依家陸續出現結果，呢個投票結果係陸續畀一個指標政府知，究竟你哋咁樣硬嘅方向係咪真係正確！」他認為這次區選結果正正是給政府一個警號，「我成日都形容，區議會係一個支線任務，何謂主線任務呢？就係我哋依家見得到呢一場咁浩瀚嘅運動，支線運動唔代表唔重要，係一樣咁重要！而大家見到呢一啲新人、素人係陸續能夠進入區議會，會唔會能夠從下而上帶來一啲改變，（證明）市民堅持五大訴求缺一不可。」
「當我哋過去幾個月努力去保護學生、保護香港人嘅時候，我發現保護我哋嘅人係大家。」在24日的區選投票日，鄺神花了近半時間為同黨的新人助選及拉票，同時，其選區票站的投票率低至三成，選情可謂相當嚴峻，但及至晚上，其選區投票率又急升至逾六成，他直言感謝全港各區同路人的「保護」，入夜後從各區前來北朗選區為他擔任義務助選團支援。
「今日都有記者朋友問我，會唔會晏晝去得太多幫新人？我覺得唔會！俾我揀多次都唔會後悔！」鄺神直言希望其支持者，以至全港選民都能夠給予新人或素人參選人更多機會，為未來的民主鋪路，「尤其是可能係無政黨背景（嘅候選人），可能佢哋都係一腳踢做出嚟，依家佢有機會當選，事實上我希望大家畀佢哋機會做好地區工作，正如我哋口號，初心不變，香港從此改變，我哋希望嚟緊嘅區議會上係會有更多年輕人、新人、素人可以一齊努力。」
今年元朗北朗選區總投票人數為7002人（連同懲教院選票），兩名候選人鄺俊宇及譚煒霖均有到現場監察點票，點票站內有兩名防暴警察在場看守。在截止投票的晚上10時半，有不少市民在北朗選區票站東莞學校排隊等候入場監察點票，有市民站在石壆上俯視票站內準備工作，其間有人高呼「要睇住有冇換票箱」獲得全場掌聲。該票站約於11時45分開放市民進入，點票工作於12時左右開始。
北朗區票站點票約20分鐘時，現場有監察點票的市民表示不滿，多名年輕市民指目睹有點票員「睇都唔睇張票就扔入盒」，多名市民在場大聲表不滿後，票站職員未有即時理會，直至現場四箱選票完成點算後，有現場市場再次大呼「咁我哋頭先個投訴係點處理呀！」，亦有人指「係咪當我哋講大話呀！」票站職員隨即開咪解釋，指現場有候選人正在監票，並指選票會再拆開再點，其後鄺俊宇開咪向在場不滿市民解釋，指仍有一箱選票未點，呼籲現場市民冷靜先等候結果。
及至12時50分，現場再有人向票站職員提出疑問，有人質疑職員沒有讓現場人士觀察較遲送到的懲教院票混票，現場人士一度鼓譟，職員將選票取出長桌後才平息。
(資料來源：網上截圖/連結)
