36歲的鄭詩君（C君）今日與拍拖5年、35歲的港台DJ女友黃天頤共諧連理，今晚在中環四季酒店設宴。今日中午新郎哥C君穿上傳統馬褂，與一眾星級兄弟團到酒店接新娘，兄弟團包括陸永、蕭正楠、黃翠如、洪永城等，而唐詩詠則擔任大妗姐一角。
眾兄弟來到新娘房時，即遞上開門利是，姊妹團不斷叫價更一度提出9,990萬，C君聽後即說︰「你哋要呢個數，李嘉誠都娶唔到老婆啦。」兄弟團籌利是錢，陸永盞鬼的說︰「嘩，真係厚到利是封都擺唔落呀。」原來他們用銀紙包着一包紙巾，卻被姊妹們發現，經過一輪議價後，C君以一封「開心大利是」順利過關。
接新娘當然不少得玩遊戲考驗吓新郎，C君與兄弟團要接受3個遊戲考驗，首個遊戲是要他們穿上美少女戰士服飾，模仿美少女戰士變身，他們輕易過關。第2個遊戲，要C君戴住眼罩口含唇膏，為兄弟們塗唇膏。之後一班兄弟要嘴貼嘴，傳送一塊心心透明膠片。最後一個遊戲，要考驗兄弟們的體力，C君要瞓在地上，而兄弟們要跟他面對面，一邊食威化餅，一邊做掌上壓，每做9下要說一句恭賀說話，新郎哥被噴到成面餅碎，十分搞笑。
玩完接新娘遊戲後，C君向老婆發表「愛的誓言」，他一改傳統指自己所寫的是與別不同，他說：「天頤婚前一直都唔畀我叫老婆、太太，就算有人叫佢做C君老婆，佢都第一時間否認，強調只係我女朋友。不過，過咗今日可以每日叫你做老婆啦。一直以嚟好多新人都係讀愛的宣言，但係宣言係可以改或者唔算數，我自己度咗一段愛的誓言，如果做唔到就天打雷劈。」
新娘天頤在房內聽到老公夾雜文言文的誓言時，既感動又開心。平時十分搞笑的C君，只輕輕錫老婆面頰一下，表現十分含蓄，在旁的兄弟姊妹們卻沒有起哄要求二人咀嘴。至於擔任大妗姐的唐詩詠，可能未背熟台詞，出現食螺絲的情況，場面搞笑，而唐詩詠亦在社交網貼相貼文，她說︰「人生真係充滿驚喜，點估到今日我會係做大妗姐，希望主人家滿意，亦衷心對所有大妗姐佩服，呢個job真係唔容易做。」
(資料來源：網上截圖/連結)
