吳家樂在昨晚平安夜主持完最後一集《今日VIP》，完成歷史任務。他今日接受傳媒查詢時表示，身為最後一集的主持，錄影完亦有跟嘉賓及台前幕後逐一影合照留念，不過未有人眼濕濕。回想做此節目，家樂表示：「估唔到一做就超過8年，其實12月初都聽到啲消息，直至一星期前正式收到通知話節目完結。每個節目都一定有完結，呢個節目都換過好多主持，不過監製好錫我，可能覺我同咩嘉賓都吹到水，每次以為會換我又冇換，結果我就一直留喺度，成為唯一一個留最耐嘅主持，所以依家結束又唔會好突然。」他表示《今》跟《兄弟幫》不同，因每集只有一個主持和嘉賓，因此眾主持平時很少機會見面，不過之後應會相約台前幕後一同食飯farewell。
家樂又笑言自己「腳頭唔好」，他笑謂：「除咗《今》之外，之前嘅《K-100》同《歡樂今宵》我都係有份做到最後一集，全部都衰喺我手。但幕後同事會否擔心前路？家樂表示幕後工作人員不止做《今》，還有負責其他節目如《勁歌金曲》，因此他們未有很擔心，但自己未有查詢稍後由甚麼節目接《今》的時段播出。
問到此8年時間有沒有難忘回憶？家樂稱早期《今》是直播，因此甚有挑戰性，即使後期改錄影，但台前幕後皆當直播一樣去做。另外，家樂又自爆最難忘早幾年訪問蔡依林：「佢當時有好多工作人員跟住，佢哋又怕我哋亂問嘢，所有問題都要scan過（審閱）先，雙方都好似作戰狀態，加上我要講國語，但我國語只係一般，同埋蔡依林都係問一句答一句，變咗我都要講好多嘢嚟撐住，不過都係一個好好經驗。」最後他表示《今》看似一個簡單訪問節目，但台前幕後皆做了很多功夫，絕沒有馬虎。
(資料來源：網上截圖/連結)
