反送中由炎夏走到冬至足足半年，仍未有緩下來的迹象。警察濫暴濫捕的烙印難以磨滅，由亂棍打人、催淚彈放題，到後來發射真槍實彈，惟每日四時的記者會，警隊高層仍盛讚前線警專業、克制。本報訪問了一名當差六年的警員，因7.21元朗白衣人恐襲感到心灰意冷決定辭職，批評高層包庇失控的下屬，令前線警將暴行更合理化，就連開實彈槍亦無後果，部份警員甚至等候開槍這個人生難逢的機會。
阿輝（化名）離開校園便投考警隊，談不上有理想和抱負，「純粹想搵工，所以我做住先」，一做便做了六年。自詡是一名「黃絲」，沒主動公開政治立場，否則或會遭「除毒瘤」般遭同袍排擠和杯葛。直至7.21這轉淚點，赤裸裸的無警時份，使他無法昧著良心同流合污。
個性衝動警員不受管束 同袍「捆綁式」共同進退
他沒料到警隊越趨腐化，就連最基本的身份證明也拒絕執行。阿輝直言，「冇warrant卡，冇膊頭no.，再蒙埋面，無論做咗啲咩，都好似無人知咁」。他指每名身穿制服的警員，膊頭位置均須展示警員編號；便衣警亦須展示委任證，「理論上係一定要show出嚟」，但大部份警員為防起底，故意摺起膊頭的編號、或將委任證反轉擺放等。他指這些所作所為全獲高層默許，「所有辨認身份嘅方法都冇咗，佢哋更加放膽去使用武力」。
由默許違規，到後來前線警如脫韁野馬般不受控制。他以北角打人為例，疑似福建幫襲擊市民後拿著武器周圍走，更多次在警方視線範圍出現，但警員卻視若無睹，「某啲高層都有鬧，話點解唔拉咗嗰班人」。儘管冷氣房的高層有微言，但拘捕與否，只能由當刻前線警或指揮官決定，命令更未必能立即轉達到前線。
此外，阿輝不諱言，部份個性較衝動或情緒較易激動的警員在執勤期間，「就算上級嗌佢都好，佢哋都聽唔到或者直頭唔理」，如上級指令不可衝入商場，但有些人依然故我，擅自離隊，其餘同袍惟有「捆綁式」與他們共同進退，「冇得放棄佢一個，由佢自己入去搏命」，往往因而造成混亂。那些衝動警事後亦不會被罰，上級最多只作出勸誡，「講聲『下次唔好喇，唔好落單呀。』」
「食花生」街坊照拉 想嚇和理非
警隊高層每天在四時記者會上維護或偏袒前線警員的失控行為，包括明明防暴警故意撞人但卻指雙方也應該有禮、故意阻撓記者採訪解讀為個別記者不合作、即使交通警駕電單車衝向市民亦毋須停職調查等；前線警員更慣性以「曱甴」侮辱市民，但警民關係主任竟說：「曱甴喺正面去睇，係咪好有生命力呢？」。對於高層護航，阿輝透露，不少警員眼見獲高層力撐，令他們更合理化自己的行為，甚至越來越大膽；他本人甚少看記者會內容，但同袍之間會在WhatsApp互相分享某些對答，「辭咗職之後睇到更加反感。」
半年以來，被捕人數超過6,000人，檢控卻不足兩成。阿輝指不少被捕者只是在現場「食花生、睇戲」，很多只是街坊，「有啲係阿叔、阿嬸，著住拖鞋、短褲睇戲，都照拉」，他說濫捕是為了「等拘捕數字多啲，令到和理非少啲出來，想做阻嚇作用。」
不少警員蠢蠢欲動開真槍
以為7.21已是崩壞至極，但後來的8.31、10.1，及最近包圍中大和理大一役，阿輝直言濫權濫捕的情況更嚴重。他指10.1「嗰一槍係完全冇必要，始終嗰一粒子彈打咗落去，無事無幹就還好，如果有事真係死咗，你良心過唔過意得去先？」該名年輕示威者最終沒事，他認為是不幸之中的大幸。他透露，警隊在開槍事件後訂立指引，一旦遭示威者圍攻而感到生命有威脅時，便可開槍。
「有人開第一槍，對佢哋嚟講，係一個鼓勵。」阿輝不諱言，眼見開實彈亦毫無後果，部份警員蠢蠢欲動有人開咗個頭，「因為始終成個警察生涯，未必會畀佢哋用嗰支槍真係實際上打落一個活生生嘅人身上。」
相信必定會有警員被制裁
被問到是否仍記得當日加入警隊宣誓的誓詞，阿輝笑言：「我淨係記得不徇私、不對他人懷惡意，但其實而家嘅同事全部都做唔到，口講一套，但到真係做嘅時候，係做唔到。」他指警員濫權濫捕的片段不會消失、對市民所造成的傷害更無法磨滅，不會獲得市民的原諒，「你當時當刻點樣對我哋，點解要原諒你？」
他直言，運動始終會有完結的一天，到時必定會有警員被制裁，「而家警察做嘅嘢，比朱經緯更加過份」，若無法得到制裁，相信任何社會都不會接受這結局。
(資料來源：網上截圖/連結)
