近半年，警民關係日漸轉差，不過無綫繼續開拍警匪劇，繼之前《伙記辦大事》、《機場特警》等，朱咪咪和組合糖兄妹今日在灣仔出席「絕膠」活動時，她爆無綫於明年2月會開拍《陀槍師姐V》，但並不是原班人馬，她說：「做番『二妹姐』，我之前拍咗百幾集，第一次返大陸拍嘢，怕冇人識，人生路不熟，原來『二妹姐』喺上面，個朵好紅。」
《陀槍》系列一直由歐陽震華、滕麗名、魏駿傑擔演，但朱咪咪透露《陀槍V》已經沒有「陳小生」歐陽震華，而林文龍早前揚言已推掉所有幕前工作，下月將正式成為亞視副總裁，她說：「聽講阿滕（滕麗名）都得，另外嗰兩個女（四喜及五福），咪話佢哋嫁咗去外國囉。」有沒有魏駿傑呢？咪咪姐以國語笑說：「怎麼可能？如果我冇估錯，應該有陳豪。」
對於無綫裁員，咪咪姐透露沒有被壓價：「我咁靚，壓咩價啫，本身價錢已經好低。（原價？）加咗少少，我同佢哋講我唔係靠TVB份糧生活，TVB份糧都唔知夠唔夠我入油，我志在出去登台，我喺美加登台，叫個價錢好高㗎，佢哋話『都知，但你都需要宣傳平台㗎嘛！』其實我地位好卑微，可以推戲，今次話盡量遷就我啲期，所以我2月會開。」
剛在美國洛杉磯登台返港的咪咪姐，她笑言與黎耀祥甚有默契：「我哋唔使夾，一企到上台，火花就嚟，我成日都話『你就好啦，成日做視帝！』我想做一次視后，祥仔話『得，陣間表演完，我去藥房買粒事後丸畀你。』我諗諗吓，啋！」
提到「絕膠」，糖妹表示經常會自備水樽，而糖兄希望食店改用再造紙盒或循環再用的盒。對於明年是兩人出道10周年，他們期待年初可出一張EP，糖妹說：「除夕嗰晚要拍部微電影，仲要特技化妝。」
(資料來源：網上截圖/連結)
