已經55歲嘅大台藝人曹永廉，曾喺社交網叫過「黃屍食屎」，加上因去警總送暖，搞到被多間公司爭相出聲明割席，之前去泰國旅行時又被笑「撐警奀星」。雖然冇工開，但曹永廉就得大灣區嘅市民歡迎，去到開見面會㖭！喺見面會上，high爆嘅曹永廉除咗派特區區旗外，更搖住五星紅旗唱《友情歲月》。
自稱係「中國香港演員」嘅曹永廉，日前以西裝Look、打埋煲呔咁去到佛山一間餐廳出席fans見面會。雖然話就話係見面會，但大會就唔知點解安排咗個結婚用嘅香檳塔，叫啱啱去到現場嘅曹永廉斟香檳，曹永廉當然冇托手踭，而且仲斟得好開心。
當嗰個所謂的見面會開始時，曹永廉除咗唱歌外，仲好親民咁落台同大灣區嘅居民握手兼合照，而佢喺多謝一班fans出席後更話：「大家都係支持愛國愛港㗎啦，咁所以我嚟到呢度呢，好開心大家都好多正能量喺度。」而曹永廉又自high咁表示見到現場有10萬、8萬fans，非常「騎呢」。
不過要講到「騎呢」之最，相信就係佢突然攞出一堆特區區旗派畀現場嘅觀眾，派完區旗後，自己就攞住支五星紅旗話：「揸住支國旗唱歌精神啲！」之後就唱出鄭伊健的《友情歲月》。到見面會尾聲，曹永廉再一次表示好多大家嘅支持，仲叫大家「今日不醉無歸飲多啲」㖭！
(資料來源：網上截圖/連結)
