放完假充電的胡杏兒，接拍導演彭發新戲《世紀風暴》，跟吳鎮宇、張兆輝、泰國影帝柏華力莫高彼斯徹（Bank）等合作，昨日眾人齊集深圳出席電影啟動禮，杏兒和吳鎮宇曾於2003年合作經典劇《衝上雲霄》，「蘇怡」和「唐亦琛」相隔17年再度合體，網民好滾動：「唐亦琛、蘇怡同框了，感動到流淚，衝上雲霄啊啊啊啊啊啊啊啊啊！」
杏兒說：「新戲講述我係有目的地埋伏喺張兆輝身邊嘅人，更周旋喺佢同鍾漢良之間。」杏兒並恭喜張兆輝早前在澳門電影節獲最佳男配角，而首次跟彭發合作的杏兒表示：「好期待佢會用咩方式去指導我。」彭發說：「知道你應承接演呢個角色，我即刻加多場動作大戲畀你。」杏兒回應：「多謝你邀請我至啱。」
至於近日引起武漢不明肺炎的新型冠狀病毒高危，經常要到外地工作的杏兒亦有提高防備：「都會隨身帶備酒精搓手液，返到屋企一定會換衫同洗手才抱仔仔，始終佢哋仲細個，我都要小心啲。」
而張兆輝第三次跟彭發合作，除了角色上有大突破，張兆輝還要接受操肌大挑戰：「導演話我太老正，今次完全顛覆以往我演過嘅角色，相信會有新鮮感，導演話會有一場游水戲，因為泳池好正，要我操六嚿腹肌配合，作為專業演員，導演覺得有需要瘦到條柴就要瘦，需要六嚿就六嚿，我今年一直冇時間操肌，呢排最多見四嚿，自己都好期待見番六嚿，但過完年就要開拍，怕唔夠時間。」
張兆輝和鎮宇是同期訓練班出身，兩人鮮有合作機會，張兆輝說：「我戲份主要係同鍾漢良、杏兒，劇本仲不斷改動中，希望導演寫多幾場同鎮宇嘅對手戲。」
(資料來源：網上截圖/連結)
