武漢肺炎疫情越趨嚴重，無綫、港台及商台等陸續取消新春團拜活動，只有亞視「無畏無懼」，今日如常在大埔總台舉行初七人日團拜。全場所有參與者都戴上口罩，連傳媒拍攝大合照時亦未有除下，確保衛生安全。
林文龍以亞洲心動娛樂副總裁身份上台致詞，全程戴住口罩的他，祝福大家身體健康：「而家疫情咁嚴峻，感謝大家今日嚟，特別感謝傳媒，咁勇敢、大膽參與。」提到來年展望，林文龍希望亞視台前幕後上下一心，令大家另眼相看，最後他有感而發：「希望早日除下口罩，輕鬆自在，呼吸每一口空氣。」
大會司儀陳佩思未有戴口罩上台，而亞洲電視控股執行董事兼聯席主席鄧俊杰，於台上致詞時亦除下口罩，他寄語大家注重身體和衛生：「少啲出去行走，多啲留喺屋企。希望有林文龍嘅帶領下，亞視可以重振輝煌。」而因事未能出席的亞視非執行董事兼聯席主席賴彩雲，特意拍攝短片祝賀，片中她透露已安排20萬個口罩，下星期送到香港，並捐出1000萬到武漢幫助抗疫。
林文龍受訪時，坦言因為疫情令社會愁雲慘霧：「希望今日可以為大家沖喜。新一年希望所有員工、無論舊同事定係新加入嘅，都可以齊心去做啲成績，最緊要有衝勁同熱誠，而今日之後，我哋亦會正式進入新階段。」
林文龍宣佈亞視將會進行重整，大埔總台重新裝修，連辦公室亦會裝修：「我同員工暫時會留喺屋企工作，或者喺出面開會。要關嘅部門，我哋都關晒，今次裝修大約要3、4個月，6月28日我哋會正式launch亞視嘅新形象同計劃。」問到他重組架構預算多少經費？林文龍直言需要改進的地方都會做，不設預算框架：「炒人亦唔係我哋放喺第一位嘅工作，只要有工作能力、工種又配合到我哋計劃嘅就會留低，同事對自己工作能力有信心，就唔需要擔心。」
林文龍表示受疫情影響，實際工作的確有影響，但期望大家團結面對：「今年新年氣氛都唔同晒，只要做好基本防禦，任何困難都可以衝破。我哋都盡少少綿力去幫內地同胞，知道香港人缺乏口罩，賴主席都撲咗20萬個返嚟，會派畀有需要嘅香港人，亞視員工當然亦係香港人啦。」
他表示今個新年取消所有拜年活動：「淨係返咗屋企拜年，之後留喺屋企，陪屋企人。我今朝喺花園曬自己曬咗兩個鐘，食個早餐，諗吓未來嘅工作。」至於近日全城瘋搶口罩及清潔消毒用品，林文龍讚老婆郭可盈很細心：「佢好早就入咗啲貨，所以唔使擔心。希望疫情快啲解決，香港同亞視都可以煥然一新，吸一口新鮮空氣係基本，搞到今日咁都幾難堪，祝香港早日康復。」雖然新年活動取消，但林文龍仍準備6位數字派利是。
亞姐梁雪瑤及羅思雅亦四出撲口罩，早前到德國旅行的梁雪瑤，在當地狂掃100盒口罩：「都係幫屋企人同朋友買，我有親戚住喺湖南，又寄咗啲畀佢哋。」她又謂兌換外幣時，亦以消毒噴霧消毒銀紙，至於工作安排，梁雪瑤希望新年後可以參與新製作。羅思雅透露母親一早準備消毒清潔用品：「呢幾日都留喺屋企休息多啲，等疫情消散少少，就有工作做。」
(資料來源：網上截圖/連結)
