醫護多年來吶喊，人手不足，但經費不斷被削，到武漢肺炎來襲，大批隱形病人壓境，醫學提倡封關，以免香港醫療體系爆煲，不過香港政府置若罔聞，令人心寒。
歌手陳健安（On仔）今日在社交平台分享攻讀護士學位時的經歷，他說當時心態簡單，只是希望讀完書可以幫到屋企人，又有穩定收入。在讀書5年間，最深刻是1,440小時醫院實習，曾經在兒科、老人科、婦産科、精神科、急症科、社康科、手術室、內科、外科等工作。當中有好多事從沒想過要由護士做，他舉例：「要學摺被、鋪床單、換枕頭、換衫褲，原來都有學問，例如patient唔可以落床或者手上插住drip嘅情況下，點樣換衫床單？假如床單無鋪直，有摺痕，會令一個臥病在床完全唔郁得嘅patient增加生壓瘡嘅機會，連帶嘅後果係有傷口、受細菌感染，不堪設想。」
On仔更分享一段對護士來說可能屬於日常，但對普通人來講就覺得厭惡的故事，他寫道：「有一個patient，只要有人行過病床就會DNLM，仲經常將大便一粒一粒放上枱面。Mentor話：『無人敢埋去，我哋更加要埋去理解。』一埋到去，我問佢做乜D人LM，佢答乜我唔記得，淨係見到佢全身都係大便，已經乾咗，仲有藏咗喺指甲入面。然後我就決定幫佢抹全身，逐隻指甲清潔，搞掂晒，得到一句回應：『唔該晒。』覺得好感動。」On仔之後又分享另一個大小便失禁的老人家故事，旨在帶出護士有好多厭惡工作，同時要做得好細心，他又舉例：「曾經見過，因為人手不足又趕時間，有清潔姐姐幫手換片，未抹乾淨就包番住，除咗污糟，仲有機會搞到patpat皮膚爛同感染，一件「小事」能否做好其實牽涉到人性、專業知識、資源、人手、制度問題。」
On仔又表示在1,440小時實習中，見過BB出世，亦為離世的人做最後護理（last office，俗稱「打包」），所有事都一世難忘。On仔希望以自身經驗，向大家說明要成為註冊護士絕不簡單，希望香港人尊重前線醫護人員，亦希望同僚工作時有充足保障。On仔在文中最後亦有撐封關，留tag「#支持全面封關」、「#一個都不能少」。
(資料來源：網上截圖/連結)
