近期無綫重頭劇《鐵探》廣受好評，劇內幕前幕後都有強大陣容，追看性十分高。早前登場嘅石修喺劇內飾演警務處處長，一出場就霸氣盡現，觀眾除咗大讚佢嘅演技，仲大讚現年70歲嘅石修keep得好好！其實石修一向都畀人一種正氣嘅感覺，除咗有型之外，其實佢仲係一個十分專一嘅好男人！但原來石修早年曾患怪病，個病困擾佢3年，體重暴跌45磅，幸而得秋官出手救一命！
石修演「一哥」霸氣盡現
現年70歲嘅石修原名陳碩修，8歲就做童星，至今從影已經60幾年。石修近日喺《鐵探》中登場，佢喺戲內飾演警務處處長郭展亮，一出場就已經超有「一哥」氣勢。其中一幕，講述石修喺醫院中槍昏迷嘅袁偉豪，途中目睹許紹雄同班同事發生爭執。
石修了解事件始末之後，決定將許紹雄調返警察學院，順道「溫故知新」，叫觀眾大快人心！
為人正氣 對太太非常專一
一向都畀人一種正氣嘅石修，其實現實中係一個十分專一嘅好老公。石修喺19歲嘅時候邂逅太太黃茹麗，女方當年只得14歲，係佢好朋友嘅妹妹。二人拍拖10年後結婚。石修曾經喺訪問中透露，同太太結婚時只採用最簡單嘅儀式，兩個都只係著便服到婚姻註冊署註冊，就連註冊官見到都笑。結果，有傳媒向佢反映結婚唔可以冇結婚相，就組團幫佢兩公婆到新娘潭瀑布下影相。
入行多年零緋聞
好多人都話做戲好容易同對手發生感情，不過，石修從影咁多年都係零緋聞。石修曾接受訪問時透露，有時拍劇都可能真係有「錯覺」出現，但拍完之後假象就會慢慢消失，所以絕對唔會有緋聞出現。
此外，佢亦好感謝太太多年嚟陪佢渡過了不少難關。石修曾一度患上消化系統怪病3年，胃部突然失去消化能力，即使食菜都消化唔到會原條排出體外，一個月內更暴跌差唔多40磅，但太太喺患病期間對佢不離不棄。後來，石修經鄭少秋介紹，認識咗一位太極師傅，仲陪佢練太極，令石修嘅病情慢慢有好轉，最終戰勝病魔。石修早前電台接受訪問透露，當年拍《楊門女將》前，原來他一度患上消化系統怪病三年，他說：「到依家都唔知病因，就係個胃忽然失去消化能力，食咩都消化唔到，當時我食一條菜，就會原條排出體外。我喺一個月內，體重由150磅跌落105磅，連行步路都冇力。」
當時他和太太遍尋名醫、吃很多藥都不能治愈，正當二人絕望時幸得「救命恩人」鄭少秋出手相助：「呢個真係個緣分，有一日阿秋同我講：『阿修！我認識九龍仔公園嘅一個太極師傅，好犀利㗎，不如我哋去試試啦』然後，阿秋帶我搵嗰個師傅。阿秋好好！要知佢嗰時有幾忙？佢陪咗我一星期，每日朝早六點幾就帶我去打太極。然後真係好神奇！打咗一星期多太極，全身關節都變暖，食欲又開始增多，漸漸開始回復消化能力。三個月後，個怪病現象就唔見咗。」至今石修仍指秋官是他的救命恩人，他說：「佢救咗我條命，真係好感謝阿秋！」
石修透露，佢喺屋企有個習慣，就係會同屋企人咩都有商有量，所有嘢都會一齊傾，令家人關係十分融洽，亦係同太太嘅相處之道。佢仲表示，因為多年嚟經歷多咗，同太太嘅關係變得密切，大家都十分珍惜彼此嘅關係。
廿四孝爸爸 為兒子放棄演戲
石修同太太於1979年誕下陳宇琛（Sam）。到Sam十歲時，石修為咗畀Sam有個好嘅成長環境生活，決定放棄自己嘅演藝事業，舉家移民加拿大，並改為經營鋁窗工廠多年。直到Sam成年，石修先再投身返拍戲，絕對係廿四孝爸爸！
重溫70歲石修歷年影視風采
62年 童星扮牛仔
1958-64年做童星嘅石修，62年首次拍國語片《鍍金世界》夥拍關之琳老竇關山，片中呢個西部小牛仔造型，有型又有格。
68年 偷食小丈夫
石修喺電影《聰明太太笨丈夫》中演小鮮肉丈夫，同一班好色之夫如曾江等人商議成立「 丈夫走私協會 」，東窗事發後成為老婆奴。
76年 叛逆富家子
76年無綫改編瓊瑤同名小說劇集《心有千千結》，講述李琳琳演嘅護士同石修演嘅叛逆富家少爺之間愛情故事，過程轟烈又充滿波折。
79年 至型花無缺
79年石修喺古裝劇《絕代雙驕》演花無缺，造型優雅中帶帥氣，飄逸又俊朗，係至型嘅花無缺。
81年 正義棄富貴
石修喺81年劇集《火鳳凰》演鄭裕玲前度，為正義棄富貴，大義滅親出庭頂證富家子兼大舅苗僑偉誤殺妻子陳秀珠，最後仲同周潤發爭Do姐。
81年 剛猛洪熙官
81年TVB劇《英雄出少年》，由石修飾演洪拳始創人洪熙官，洪拳以剛猛勇悍見稱，修哥耍起上嚟亦勁度十足、似模似樣。
82年慕容復爆紅
82年版《 天龍八部 》石修演慕容復，風度翩翩、氣宇軒昂、高傲俊美，被譽為「永遠的慕容復」而紅遍中港台，套劇83年台灣大 hit，爆紅嘅修哥於84-86年間到台灣發展。
85年 戀上藍潔瑛
石修85年偷閒回港拍劇，喺《六指琴魔》中演玉面神君東方白，同藍潔瑛大婚之日，六指琴魔以琴音令由吳啟華演嘅東方白徒弟亂了性而同藍潔瑛親近，三人關係亂到九彩。
86年 返娘家弄權
86年石修由台灣返港回娘家無綫，隨即參演集周年台慶劇《黃金十年》，佔戲頗重，劇中為人工於心計，為奪權不惜玩弄感情。
87年 型到爆刑警
石修喺警匪劇《大班密令》演除暴安良，殲滅國際性罪行嘅國際刑警，西裝骨骨，左手插褲袋右手揸槍，係至型嘅國際刑警。
01年 演荷李活片
01年石修參演由嚴浩執導嘅中美 合拍荷李活電影《庭院裡的女人》， 《蜘蛛俠》「綠魔」威廉達福演嘅30年代家庭教師竟然愛上石修太太，而石修個造型望落真係幾似方力申。
