田蕊妮今日42歲牛一，跟她結婚14年的老公杜汶澤當然有送驚喜，阿田日前在演唱會用結他自彈自唱林二汶創作的《守望杜田》，她為開騷苦練結他會歌迷，阿澤即趁老婆生日送她一支靚結他和喇叭做禮物。
阿澤今日在facebook分享了如何冧老婆，他說：「噚晚趁佢去沖涼就喺車尾箱搬支結他同個amp入屋啦！到佢沖完涼，我叫佢落樓下收生日禮物，佢喺樓梯口首先見到個amp，跟住叫咗出嚟！」阿田猛問：「嘩！你買個amp畀我呀？嘩！咁幾多錢呀？」阿澤心想只是千餘元太便宜才沒出聲，但阿田已非常興奮，因為她眼中只看到amp，沒看到枱面上的結他，阿澤示意老婆望向另一邊，才發現了有一支結他，阿澤說：「好多謝Gary Chan特登陪我去揀咗一個晏晝，2016買咗隻撈畀佢，諗住十年唔使送禮物，點知之後都冇乜點見佢戴過。見佢見到支結他嗰個驚喜樣，我諗呢次扑中咗，希望佢有朝一日玩到好似Orianthi(米高積遜演唱會御用女結他手)咁啦！人哋6歲開始彈，佢今年42歲，其實都唔係遲好多啫！」
阿澤太知老婆心意，果然如他所言「扑中」了，阿田也在fb貼出禮物後留言：「今年生日並不覺得特別開心，啱啱冲完涼，杜先生同我講生日快樂，之後話生日禮物喺樓下！我一打開個盒見到大叫咗起碼1分鐘！癡線！佢買咗支電結他送畀我！我只不過學咗木結他3個月，而家要學埋電結他！係咪整蠱我呀！呢份禮物係佢送過畀我令我最最最開心㗎！救命呀！我而家好唔冷靜呀！支結他好靚呀！」
(資料來源：網上截圖/連結)
