才女梁芷珊與前南華足主羅傑承在2002年共諧連理，到2017年離婚，梁芷珊現時與法國靚仔名廚Olivier Elzer蜜運中。杜汶澤網台節目《CEO會客室》新一集就請到梁芷珊做嘉賓，當中就講梁芷珊與羅傑承的感情，更爆出一段羅傑承作為特首選委的歷史。
梁芷珊在節目中講到與羅傑承相識經過：「我遇到佢時都成30歲，點開始呢？佢話要買我版權拍電影，仲叫我做埋編劇，點知開鏡個日先知係佢。總之朝日相對咗一段時間，套戲喺元宵首映，情人節上映。點解結婚呢？因為奉子成婚囉。」離婚後，梁芷珊形容「OK架，唯一分別就係唔瞓喺隔籬，平時都係講下個女講下公事。」
梁芷珊又說另一半鍾意睇波睇馬，所以就選擇一起享受，陪睇波睇馬。引起阿澤好奇問：「而家有啲社會問題，你都會因為正義或者任性出聲，如果同佢一齊咁你咪冇得出聲？」梁芷珊就講出一段歷史，原來羅傑承當年是2012特首選舉1,200名選委之一，羅傑承做了一件梁芷珊形容為「有正氣」的事，她說：「過程中有好多人力陳利害，嗰時佢係點都唔肯選689，呢樣嘢我係好proud of佢。佢投完票，返嚟換咗套睡衣等睇電視點票。佢見到係689勝出一下，佢好義憤填膺，佢都係話，唉香港仆街喇。」梁芷珊形容羅傑承：「都係好有骨氣嘅人。」在選舉當中，有人會游說，亦有人轉軚，不過梁芷珊說：「我唔知有冇記錯，佢都有話畀我聽『唔得呀，我唔可以咁做，我唔投佢呀。』」梁芷珊又指：「並唔係話佢因為係一個生意人就一定藍嘅，我唔覺得佢非常係囉。」
(資料來源：網上截圖/連結)
