73歲的劉江在無綫服務32年，昨日正式離巢，今日是劉江回復自由身的第一天，早上臨出門做運動前，他接受電話專訪：「心情好平常，冇乜起伏，因為呢個日子嚟嘞，我都要接受，呢個決定係好難，但已經決定咗，心情都係好開心。之後會去旅行啦，喺台灣過年。」
有報道指，劉江離開原因是不斷被無綫減人工，由高峯期6萬元減到7,500元，早前傾續約時，無綫又要求減騷，令他兩晚瞓唔着決定唔做，劉江連聲否認：「7500蚊？冇呢啲事，係我唔想做啫，30個騷點會7500蚊㗎大佬，黐線，呢啲唔知乜嘢人計出嚟，我唔知。我瞓唔着係諗住做定唔做，我係諗住唔做，但決定時感情上都係有啲唔好受嘅，因為我始終工作咗30幾年。」
劉江指不是因為減人工問題，令他難受而離巢：「唔係呢個問題，我一直同公司講做少啲，呢個好正常。鍾意做戲都冇用，有時你太辛苦，年紀大做唔到，70幾歲，夜晚開完廠，揸車返新界，第二朝8、9點又開工，你捱唔捱到？係咪，電視係咁樣。」
在無綫服務多年，劉江感受好深：「老實講，我做咗30幾年，我生活安定都係佢畀我，咁你喺一個機構做，梗係有開心有唔開心，呢啲好平常，唔可以期望一間公司，由頭到尾都咁乜嘢㗎，況且佢而家環境都唔好，呢啲好正常。」
越來越少觀眾睇無綫，由風光期滑落至現在被離棄，會否覺得心淡？劉江說：「呢個係規律，以前我哋喺佳藝電視、麗的電視，求人去睇都冇人睇，個個都係衝住去睇無綫，好啦，到我過咗無綫之後，佢哋睇返麗的，嘩，咁好睇！我話係呀，而家話好睇都死啦，麗的已經消失咗，而家話無綫啲嘢唔好睇，咁唔好睇又點啫，你哋成日都衝入去話好嘢嘛，呢啲好正常。」
覺得現在無綫劇集水準如何？劉江語重心長說：「水準呢，其實係向好嘅，個個都想做好啲，因為少人睇咗，個個都係好想做好佢，呢個係正常嘅。」問劉江有冇睇劇？他坦言：「冇。」已經沒興趣追劇？冇一套吸引？他笑：「哈哈，自己做嗰啲咪有囉，或者人哋話呢套戲好睇，都會望吓，睇吓人哋水平去到邊。」
問到拍劇多年，最開心是那段時間？劉江說：「好難講，唔開心時可能遇到好劇又開心，所以冇話邊段時間開心，不過，人呢越嚟越離開咗好多，開始有斷層，做戲上比較難做啲。」對於視后田蕊妮昨日都宣佈約滿離開，劉江愕然問：「係咩，我唔知，你知我不問世事。」問到是否覺得好戲之人陸續走，冇一個可以跟他交到手？劉江坦言：「可以咁講，哈哈哈。」
高手走晒，老戲骨一個一個接一個走，劉江笑說：「所以我都好想行出嚟，睇吓有冇人搵吓我，遇吓啲對手，都係一件好事。」想跟那人合作？他說：「我唔知呀，我有乜想啫，我都唔知有乜人喺度，我喺TVB咁耐，出面點樣我都唔知，係咪？」有公司向你招手了嗎？劉江口密：「唔知，總會江湖見！」
昨日last day，劉江返無綫跟同事道別，曾任藝訓班導師的他，遇上學生吳嘉儀（阿七），兩人合照留念，阿七在社交網留言：「回想你做我哋訓練班嘉賓老師，係第一個教我睇電視台rundown，第一個講解咩係拍攝分場、劇本，『老師』大方分享了你嘅經驗，多謝您！仲記得你個小秘密分享：今日拍嗰幾集內容，相關劇本要跟身，其他集數劇本帶埋喺車尾箱，隨時standby！這是專業、敬業、演員的好榜樣，希望有一天能一起同場演戲 #劉江 #劉老師 #farewell #講呢啲 #一代忠師 #江湖見 #thankyou #人生有幾多個50年」
(資料來源：網上截圖/連結)
